Durante e rueda di prensa semanal di fraccion di PPA, parlamentario Eduard Pieters a lanta un critica duro riba e presupuesto di DOW presenta door di gobierno, calificando e maneho como un insulto na inteligencia di pueblo Arubano. Segun Pieters, gobierno ta cobra ciudadano manera holoshi ta cana, pero ora ta momento pa entrega infrastructura digno y safe, nan ta core tras di excusa y propaganda politico.
E cifra cu a crea mas indignacion tabata e revelacion cu gobierno, segun presupuesto di DOW, kier inverti solamente 3.5 miyon florin den asfaltamento y mantencion di e camindanan pa 2026. Den practica, esaki ta representa a penas 7.5 kilometer di asfalt pa henter Aruba. “Pa pueblo tin un idea kico e 7.5 kilometer ta, imagina bo for di retonde di aeropuerto te banda di retonde di Guardian Group. Esaki ta loke gobierno y coalicion cu ta sostene gobierno ta presenta como ‘progreso’ pa un pais cu mas cu 90 mil vehiculo,” Pieters a declara.
Pueblo ta paga miyones, pero caminda ta sigui manera zona di desastre
Pieters a pone e contradiccion financiero riba mesa cu un calculacion simpel, pero devastador. Cu un promedio conservativo di AWG 350 pa impuesto di auto y mas cu 90 mil vehiculo na Aruba, gobierno ta cobrando aproximadamente 30 pa 31 miyon florin pa aña y esaki ta solamente na ‘motorrijtuigbelasting’. Sinembargo, a penas 11% di e entrada aki ta bay bek na mantencion y drechamento di caminda.
“Ciudadano si ta paga completo. Gobierno no ta entrega completo,” Pieters a enfatisa. “Mientras pueblo ta paga belasting, nan auto ta kibra den buraco, hende ta core riesgo den trafico y Aruba su infrastructura ta bira cada dia mas peligroso.”
Pa PPA, e problema no ta falta di recurso, pero falta di prioridad, vision y maneho politico. “Aruba no tin falta di entrada. Aruba tin falta di gobernacion serio,” Pieters a declara.
Coalicion a vota contra nan mesun posicion
Segun Pieters, e situacion a bira ainda mas absurdo, ora e parlamentarionan di AVP y FUTURO a rechasa e mocion di PPA pa converti impuesto di auto den un bestemmingsbelasting, pa asina garantisa cu e placa ta bay directamente na DOW y siguridad di caminda.
Pero despues, e mesun coalicionnan a presenta un mocion reconociendo cu:
no tin suficiente control riba e presupuesto,
no tin garantia unda e placa ta bay,
y cu e maneho financiero actual no ta cla.
“Nan a rechasa nos mocion y despues nan a presenta un mocion cu ta impugna cu e presupuesto,” Pieters a critica. “Esaki no ta liderazgo. Esaki ta politica barata y sumiso na bo gobierno.”
Ainda mas fuerte, coalicion a termina votando pro un presupuesto cu nan mes oficialmente a pone na duda. “Si boso mes ta bisa via un mocion, cu e presupuesto no ta bon structura, con bo ta vota pro p’e despues? Esey ta hipocresia politico y falta di caracter personal y politico,” Pieters a declara.
Siguridad di caminda uza como djis slogan mas di campaña
Pieters tambe a recorda cu Aruba no ta enfrentando solamente problema di asfalt, pero un crisis real di siguridad riba caminda. Drempel, e detectornan di velocidad, ingenieria di trafico y mantencion preventivo tur ta sacrifica door di falta di inversion, gobernacion y vision serio.
“Pueblo ta pidiendo siguridad. Gobierno ta contesta cu djis duna e minimo,” el a bisa.
Pa PPA, e situacion actual ta mustra claramente cu coalicion no ta controla gobierno, pero ta sigui gobierno ciegamente, pio ainda, ora cu nan mes ta reconoce mediante un mocion, cu e presupuesto no ta cuadra.
“No hunga cu inteligencia di pueblo Aruba”
Pa clausura, Pieters a acusa gobierno di purba di bende propaganda como si fuera esaki ta progreso real.
“Pueblo no ta pidiendo luho. Pueblo ta pidiendo caminda, cu no ta pone bida na riesgo y cu no ta costa ciudadano miles di florin extra den daño di auto,” el a conclui. “Ora bo cobra 31 miyon florin di impuesto y bo ta duna a penas 3.5 miyon na pueblo, esey no ta progreso. Esey ta abandono institucional cu ta haya un make-up cu slogan politico”.
