Pa motibu di e medidanan vigente relashoná ku e vírùs di corona, lo ofresé un programa kultural virtual riba Dia di Rincon, 30 di aprel. Dia di Rincon ta un manifestashon kultural anual ku nan ta organisá pa 32 aña kaba i ku ta atraé mas ku 4000 bishitante. E meta prinsipal ta pa trese hende serka otro pa di e manera ei laga nan gosa di tur e partinan importante di e patrimonio kultural di Boneiru.
Dia 26 di febrüari último diputado señora den Heyer a menshoná ku e aña aki lo no tin un selebrashon sentral di Dia di Rincon i ku na lugá di esaki lo bini un programa kultural virtual. A palabrá ku lo tuma lugá un selebrashon virtual di Dia di Rincon, ku ta kuadra ku e medidanan di prekoushon relashoná ku e situashon aktual. For di 22 di aprel 2021 Boneiru ta na nivel di riesgo 4 i esaki ta nifiká ku ainda no ta posibel pa organisá evento.
For di departamento di Supervishon i Mantenshon di Lei lo ofresé tambe e guia nesesario durante e evento akí. Lo por sigui e programa kultural virtual ‘Mi kultura t’e kos’ entre 13:00 or i 19:00 or via pagína di Facebook di ‘Mi kultura t’e kos’ i via Live 99FM Boneiru i e kanal di youtube di Live 99FM.
‘Nos ta biba den un tempu ku tin hopi preshon riba salú mental di nos poblashon. Arte i kultura ta formanan di ekspreshon, ku por sòru pa nos por eksperensiá momentunan di alegria tambe,’ segun diputado señora den Heyer.
1 comment