Dia 15 di september ultimo tabata dia internacional di democracia cu e enfoke principal di hoben y e rol cu nan ta hunga den e mantenemento di e democracia den nos pais y mundo. E rol, proposito y importancia di no solamente hobennan pero tambe nos hobennan adulto y adultonan den e area aki ta uno grandi pero no imposibel pa eherce.
Prome nos bay den mas detaye di e rol cu nos como co ciudadanonan y ciudadanonan ta hunga den e democracia di nos pais nos mester compronde “kico” ta democracia. Democracia ta un sistema gubernamental unda e poder di escogencia y expresion ta den man di e ciudadano di e pais of e persona cu nan ta scoge como nan representante den e organo mayor y principal di no solamente nan pais pero tambe internacional, cual pa nos pais ta e caso unda nos ta scoge libremente y anonimamente nos representante nan cada pasa 4 aña, cual ta reenforsa pakico vota ta algo importante pa nos presente y futuro. Democracia cual literalmente ta significa “e poder ta den e man di e pueblo” ta respalda e derechonan y leynan manera: articulo 18 pa 21 di declaracion universal di derecho di humano y ley electoral. Cada un di nos, no ta importa si nos ta mucha, hoben, hoben adulto, adulto of adulto mayor nos tur tin e derecho pa vocifera y scoge loke pa nos ta importante y necesario pa nos pais y nos bida personal.
Democracia y dia internacional di democracia ta laga nos como hoben y adulto reflexiona riba e estado di e democracia riba nos pais y con nos por yuda fortalece y mantene esaki. Kico?, Pakico?, Ken?, Ki tempo? ta tur pregunta cu nos mester puntra nos mes ora nos kier participa activamente y vocifera loke ta bayendo bon of malo den e area democratico di nos pais, ta critico pero habri pa cambionan transicional pa un futuro sostenibel ta importante y mas importante ainda nos derecho fundamental. no tene miedo y no keda keto ta e pilarnan principal den respalda nos democracia.
e rol di nos como hoben y adulto y cada uno di nos co ciudadano nan ta pa mantene nos opinion y pensamento bibo den e organo principal di nos pais y den nos sociedad. Nos mester por para firme den nos pensamento y expresa esaki cu respet y balor constructivo pa e mehoracion di nos pais. Pa esaki por sigui mantene e democracia pero tambe e derecho cu nos tin. Nos mester cuminsa como hoben, hoben adulto y adulto fortifica e norma y balornan den nos pais ora di para pa nos democracia cu ta respet, tolerancia, negociacion y solidaridad mutuo, cada un mester traha hunto pa asina nos democracia sigui fortalece.
Por ultimo, ki ta e rol cu abo ta hungando den nos sociedad den e area democratico di nos pais?, con abo ta cla pa respalda esaki? y Kico ta loke bo persona ta cla pa haci pa haci un cambio positivo, constructivo y sostenibel den nos pais?. Puntra bo mes e pregunta nan aki y e contesta di kico ta bo rol fundamental pero principal pa cu nos democracia lo cuminsa forma. Mantene, respalda y respeta e derecho democratico di nos pais y nos futuro ta cuminsa awo y cu cada un di nos.