Rotary Club Aruba a entrega mas di 400.000 florin na donacion

Tur aña 1 di juli Rotary Club Aruba ta cambia di directiva. E aña Rotario cu a caba tabata uno hopi exitoso pa Rotary Club Aruba. Despues di di pandemia na unda cu hopi evento no por a wordo organisa manera custumber, e aña aki por a mira un diferencia den e animo y recaudamento di fondo. 

Na December 2022 a tuma luga e “Annual Charity Golf Tournament” na unda cu Rotary Club Aruba a logra recauda mas o menos AWG 100.000,- na fondo. Esaki sigur tabata un exito rotundo, Shelby Maduro Presidente saliente di Rotary Club Aruba ta comenta. 

Despues di e evento aki preparacionan a cuminsa pa e grandioso “Fiesta Rotaria”. E aña aki e di 40 edicion a wordo organisa atrobe despues di 3 aña. Cu e grandioso rifa y e evento mes di “Fiesta Rotaria”, Rotary Club Aruba a logra di recauda mas cu AWG 300.000,- na fondo.

Manera ta conoci Rotary Club Aruba ta yuda diferente fundacion nan den nos comunidad cu sosten monetario pa asina nan por sigui haci e bunita trabao pa esnan cu mas mester den nos comunidad.

Rotary Club Aruba ta precura pa yuda ariba diferente tereno, manera nos grandinan na Kibrahacha 60+, nos muchanan na Casa Cuna, nos hoben nan na YMCA, esnan cu desabilidad pero asina mes activo na Sonrisa y Trampolin pa Trabao. Grupo nan si Scouting cu ta yuda nos tur aña na “Fiesta Rotaria”. Esnan cu ta precura pa alimenta nos muchanan, y hende grandi Ban Uni Man pa Cria nos Muchanan, Meals on Wheels. Diferente fundacion nan cu nan proyecto special manera Micky’s Foundation, Lean on Me y Leerorkest. Tambe nos a yuda Rode Kruis Aruba, Muchila Creativo, Hunga Teca, Koningin Wilhelmina Fonds, Stichting Edmund Harms, Stichting Sociale Fonds Colegio Arubano y Fundacion Contra Violencia Relacional. Esaki nan ta un paar di ehempel di fundacion nan cu ta conta cu e sosten di Rotary Club Aruba.

Ademas e aña aki a logra instala mas water coolers na diferente scolnan rond di Aruba. E proyecto aki a cuminsa un paar di aña atras. E ta meta ta pa instala un water cooler na cada scol na nos isla. Asina aki promove nos mucha nan pa bebe awa y ta mas sostenibel door di usa un termo. 

Presidente Shelby Maduro y su directiva ta termina un aña contento y satisfecho cu e logronan di e Club e aña aki. Un gradicimento ta bai pa tur esnan cu semper a kere den nos causa y meta, nos sponsors, comercio di Aruba, tur esnan cu ta cumpra nos rifa, nos boluntarionan y sigur na nos miembronan. Un danki tambe ta bai na nos partners Rotaract Club of Aruba, Interact Club of Aruba Schakel College, Interact Club of Colegio Arubano y Interact Club of International School of Aruba.