Local

Ruthy”Lady Ruth” Vriewijk-Bergen: Sabiduria den nos alegria

Ruthylady Ruth Vriewijk Bergen

Ahaaaaa! Nos a drenta e luna di Oktober, luna di flor ! Luna di Gracia ! E ultimo kwartaal di anja 2022. Nos no kier ansha e dia pa e pasa mucho liher, nos kier disfruta di cada momento, cada minuut cu nos tin nos salud pa sigui celebra meymey di nos hendenan stima. Lady Ruth ta contento cu e tambe por a contrubui na dos grabacion chikito na fabor di Prins Bernhard Cultuur Fonds Caribisch gebied. Un di e instancianan cu ta yuda artistanan y escritornan regularmente financieramente pa asina nos como artista por realisa nos sonjonan y logra concretisa nos projectonan riba e tereno di arte y of literatura. Tin cu yena y cumpli cu nan formularionan, pasobra, handel cu placa ta algo serio. E fondo tey pa yuda, pero tin cu cumpli y yena contesta nan preguntanan, algo cu no ta tur artista tin pasenshi pa hasi. Lady Ruth ta sumamente contento y bendiciona tambe cu e yudanza cu e ta ricibiendo di DCA Departamento di Cultura, Unoca, y Cas di Cultura , como tambe di La Moderna, Optica Moderna, Go Cultura  y DHL (falta solamente un suma mas, pa tur cos por ta cubri) Cu e benta di tickets nos por yuda Animal Shelter. DANKI na tur pa hasi posibel su di tres One woman show “Alegria di Ruthy 3″ cu lo tuma lugar Diaranzon dia 14 di December 2022. E show lo cuminsa 8 or di anochi y lo  briya cu musica, canto, bayle y poemanan den 4 idioma. Nos tema : “Holland-Aruba-Love with a touch of Christmas”. Lo por sinti un dushi ambiente di Pascu, aunke no ta tur e canticanan y poemanan ta trata e tema Pascu. Lady Ruth lo celebra su di 50 anjanan den Farandula hunto cu su di 65 cumpleanos cumpli na luna di Juni ultimo y su di 45 aniversario di boda cu Johan Vrieswijk dia 21 di December 2022 . “Three in one”.  E tres den un cu ta tocando nos curason ultimamente, “Den nomber di Tata ,Yui y Spirito Santo” ta e ceremonianan religioso na Koyari, creyentenan fiel den nan costuumnan uniform bunita di e tema y of Santo cu ta na turno di celebra. E bunita anochi cu celebracion di Santa Madre Teresa, un team a bisti na e trahe di Mama Teresa. Belloooo!!!E bunita anochi cu celebracion di Pader Pio, algun di nan team di fielnan a bisti na e trahe di Pader Pio. Ki bunita e altar cu flornan ta keda !  Y por sende un bela den e sala di belanan pa cualkier gradicimento of peticion. Y Diasabra ultimo cu e bunita celebracion di Santa Teresita, otro anochi bunita yen di Gracia. Ta normal pa pasa tuma collect, pa yuda cu e gastonan naturalmente, ora e curason ta guia.  Diamars dia 4 di Oktober ta celebracion cu e Vidente di Koyari, Valerie, na sirbishi di Dios y fielnan y creyentenan ya ta 24 anja. Ta Hesus mes ta carga su sirbidornan pa medio di su amor y ta mustra nan y duna nan forsa pa sigui padilanti. Amor di Dios no ta mescos cu Amor di hende, pero e fuente di Amor pa tur ta Hesus, e yui di Dios y Mama Maria. Asina mes nos tur por stima mas mihor posibel, cu e amor di Hesus den cada un di nos. Nos ta sinja pordona otro nan errornan, nos ta sinja resa pa nos enemigonan y nos ta sinja cu nos niun ta perfecto. Nos ta wordo guia y inspira pa nos Angel y Santonan. Nos curason ta yena cu mas di e luz di Hesus. Ay, nos tambe ta anticipa e temporada di mas dushi cu ta Pascu pa celebra e cumpleanos di Hesus. Permiti nos felicita Vidente Valerie pa su perseverancia den su caminata y mission  den e bida aki, na sirbishi di Dios y su prohimonan. E tambe ta un hende muhe suave pero fuerte y bunita den su fe, e tambe por y ta stima den carni. E ta mama di 3 yui muhe  y wela di un nieta preciosa . Valerie tambe sa cansa di hopi trabao, pero e sa di lanta bek y sigui padilanti. Pabien mi bunita amiga ruman, pabien cu bo 24 anjanan den bo trabao. Dios ta stima’bo mas cu bo por pensa. Bo ta den nos curason y oracion. Danki pa bo bon y bunita trabaonan cu bo ta logra cu gran ayudo di tur bo rumannan den Christo di Koyari y Aruba. Dios ta stima cada un di nan masha hopi mes !

Lady Ruth, e artista y Poeta di Aruba, ta brinda riba bo , cu un dushi glas di binja, specialmente dia 4 di Oktober 2022, na caminda pa bo 25 anjanan !! Stay safe, nos dushi hendenan, love you too ! Ban sigui cuida otro, ta palabranan hopi usa y practica di Vidente Valerie, algo bunita pa hasi, ban sigui cuida otro !

Img 20221001 Wa0027Img 20221001 Wa0034Img 20221001 Wa0059 1

Related posts

Minister Dangui Oduber: Nos aeropuerto ta cla pa añadi un otro capitulo den su historia

EA News Author

Premier Evelyn Wever-Croes: Lezing di dip riba e ropv: E ROPV ta hisa e calidad di un pais, unda cu bo por planifica y ordena un pais su infrastructura estetico

EA News Author

Vice presidente di Comite Olimpico internacional Nicole Hoeverts: Soñonan ta bira realidad

EA News Author

Leave a Comment

Whatsapp Message