Un bon dia yen di sabiduria den nos alegria ! Lady Ruth ta spera cu tawata un fin di siman trankilo y pacifico, yen di dushi paz mental, emocional y spiritual pa tur. Hopi ta e fielnan cu a reflecciona ariba Bierna Santo y of cana caminda di crus y despues Diadomingo Pascu Grandi di Resureccion bay nan misa pa gradici Dios pa e regalo manda pa nos, su yui Jesus, cu a muri pa nos tur ariba e crus, recusita di tres dia, pa tur cu kere den Dje, por hanja bida eterno. Manera ta para den e buki mas lesa y mas cumpra, e bijbel, den San Juan 3:16. Bierna Santo den oranan di mainta laat Lady Ruth a scucha full e musical di e pelicula famoso di anjanan setenta “Jesus Christ Super Star” y a recorda su bunita presentacion di e cancion “I don’t know how to love Him” den un di e festivalnan di canto di Aruba Beach Club y Casa del Mar, anjanan pasa, cu acompanjamento musical di e talentoso musico e gentil cabayero Amado Rosina. Nos a bira emocional y a realisa cu nos ta aki ketobay den bon salud. Nos por comparti cu nos famia, nos por sigui comparti di nos talentonan y nos por sigui sinya algo nobo cada dia. Y cu nos lo sigui gradici Dios Tata Eterno pa su amor incondicional. Su bendicionnan ta mucho hopi pa menciona.
Diasabra nos a keda cas reflecciona y medita scucha musica gospel. Diadomingo nos a bay pa un “hapje” y bebe un glas di binja na Plaza Café, wak si nos por a hanja e webo di oro den e bom di e glas di binja . (Hahahahahahah) Awe nos ta comparti un crenchi di un otro tremendo “Anochi di Poesia” na “Neighba Café” den curason di San Nicolas cu a tuma lugar recientemente cu e tema “Consciencia”. Hopi tawata e poemanan relaciona cu e tema aki na diferente idioma. Poemanan impactante cu ta inspira nos tur. E biaha aki Lady Ruth no a logra skirbi su poema relaciona cu e tema aki. Cu un danki grandi na e instancianan cu ta hasi posibel tene “Poetry Night” regularmente. Danki na e ayudo di Prins Bernhard Cultuur Fonds Caribisch gebied, CMB bo banco amigo, Setar NV, Basha Foundation y Vibration PR Maria Silva Hart cu a cuminsa cu e bunita proyecto aki hopi anja pasa y cu mas y mas artista Poeta ta bin participa y habri nan curason cu nan sintimento den nan palabranan poetico. Tin musica, canto y poesia. Tin intercambio di pensamento, tin bunita comunicacion entre tur presente. Nos ta sinja di otro. Nos ta apoya otro. Nos tin un oido pa otro. Tur esaki den un dushi ambiente y tremendo bon servicio di Neighba su staf y personal. Ki dushi ta nan cumindanan tipico e.o. nan coconut curry shrimps cu dushi johnny cake. Nos tur tawata contento di por a mira e cabayero Eribert Lama conosi como “Beach Laman”, su nomber artistico, e artista grandi di tur Diamars na Fort Zoutman Willem III toren cu e presentacion fabuloso di e esclava “Virginia”, cu ta laga nos turistanan impresiona sigur.
Semper contento tambe di mira y scucha e bon animacion di e anochi nan di Poesia , Leo Phillips, como tremendo maestro di ceremonia, kende ta maestro di ceremonia tambe na Fort Zoutman tur Diamars. Caranan conosi presente regularmente na e “Nochinan di Poesia” ta e.o. Helena Fornara, Ariana “Lady Ari” Koolman-Chirino, Walter Mohamed, Jhon Freddy Montoya, Maria Silva Hart, Aaron “Rocky” Giel ariba su cuarta tocando y cantando su dushi musica, Lady Ruth mes y hopi hoben conosi pa cara y bunita curason, ( no por corda tur nomber ) cu ta debuta y of sigui bin participa. Pearl Dumfries como e artista “Watra” cu regularmente ta capta nos atencion y curason cu su bunita presentacion. Danki Pearl . E bunita anochi aki na Neighba, a wordo dedica “un momento” na amiga colega Poeta Nena Ponson ( rip) cu su bunita poemanan semper declama di curason foi memoria. Nena ( awe dfm) te ainda cu su 80 anja di edad a inspira nos tur cu su bunita manera di presenta cu asina hopi amor y pasion. Awor Nena pa semper mas serca di nos mente, alma y curason. Nos tin cu gradici tambe Jhon Freddy Tobon Montoya, ganador absoluto den Poeta Patria, pa semper saca bunita potret di e Nochinan di Poesia den nomber di departamento di cultura y tambe e gentil cabayero Anuar Habibe cu fielmente ta presenta cu su camera pa saca potret.
Danki na tur cu ta hasi e anochinan di poesia posibel, tresiendo arte di palabra mas serca di hopi curason. E lugar ta varia, pero e amor ta mes of mas fuerte bunita expresa cada biaha atrobe
Danki Basha Foundation, Vibration PR, Setar NV, CMB y Prins Bernhard Cultuur Fonds Caribisch Gebied. Danki pa lesa nos relato y pasa un bon dia yen di sabiduria den nos alegria.
Un “bearhug” di Lady Ruth pa boso tur ! Keda pendiente pa nos siguiente Poetry Night na luna di Mei , (lo anuncia riba face book y demas social media, su fecha, su lugar y su ora ). Ta gusta escoge lugarnan bunita y suave, mayoria biaha anochi bau streanan na shelo, manera Kulture Café den curason di San Nicolas. E programa ta cuminsa 8 or, pero ta prepara pa cuminsa ricibi e artistanan Poeta y publico amante di e arte di palabra un par di ora mas tempran, cu dushi ambiente social cultural.
