Representantenan di e sector di pesca na Aruba a expresa nan preocupacion profundo tocante e manera cu decisionnan y regulacionnan di proteccion maritimo ta wordo implementa. Segun Arthur Giel, Presidente di Fundacion Hadicurari, e falta di data cientifico y e falta di consulta cu e comunidad di piscado ta conduciendo na medidanan cu ta perhudica seriamente e medio di subsistencia di hopi famia local.
Durante un declaracion recien, Giel a remarca cu regulacionnan no por wordo presenta ni aproba den Parlamento sin cu tin investigacionnan concresi y data confiabel cu ta sostene nan. “Cada bes cu nos ta bay reunion, e contesta ta cu no tin data. Pa por lanta regla of ley di e forma aki, mester haci investigacion y trece expertonan cu por presenta cifra y estudio concreto,” Giel a enfatisa.
Impacto Directo riba e Piscador y Costumber Local
E restriccionnan y ceramento di cierto zonanan maritimo incluyendo areanan cerca di Malmok, Rio Barriba y e costa di Alto Vista no ta afecta unicamente e sector turistico of di recreacion, sino cu ta golpia e piscado nan tradicional y esnan di edad avansa directamente.
E cambionan aki ta haci e distancianan mas leu y e condicionnan mas dificil pa esnan cu henter nan bida a depende di e ofishi aki pa sobrevivencia of pa e consumo familiar di tur dia. E manera cu a impone e medida estricto sin e debido analisis local ta restringi acceso na e lama parti Noord, afectando severamente e custumbernan di e comunidad.
Comparacion cu Region y e Rol di Politica Local
Giel a menciona cu, despues di a tuma parti den reunionnan di consulta den exterior (manera na Saba, Sint Maarten y Sint Eustatius), ta evidente cu cada isla y pais tin e autonomia pa dicidi e grado y e manera cu e leynan di proteccion ta wordo aplica.
Aunke hopi biaha ta wordo argumenta cu e leynan aki ta deriva di tratadonan internacional of di e relacion cu Hulanda, e lider di e fundacion a aclaria cu e responsabilidad pa haya un balansa adecuado entre proteccion di naturalesa y e bienestar di e pueblo piscado ta den man di e politiconan local.
Un Yamada pa Dialogo y Balansa
E mensahe di e sector di pesca pa Gobierno y e instancianan concerni ta cla:
Tene consulta transparente: Sienta na mesa cu e piscadonan y e stakeholders prome cu tuma decisionnan drastico.
Presenta data y investigacion: Basa cualkier regla nobo riba estudio cientifico i no riba suposicion.
Busca un balansa: Garantisa proteccion di nos recursonan natural sin laga e comunidad di piscado y e economia local den e desamparo.
Fundacion Hadicurari ta reitera su disposicion pa dialoga y colabora pa asina yega na solucionnan husto y sostenibel cu ta respeta tanto e medio ambiente como e tradicion di pesca na Aruba.