Selebrashon Dia Internashonal di Museo ku diferente aktividat

Ta selebrá Dia Internashonal di Museo ku diferente aktividat ku ta habrí pa públiko riba diferente dia. E aña akí e selebrashon ta rònt di e tema ‘Museo, Sostenibilidat i Bienestar’ i Dia Internashonal di Museo mes ta kai ofisialmente riba djaweps 18 di mei. Tur hende ta kordialmente bon biní pa asistí na e aktividatnan akí.

Dia 29 di mart selebrashon di Dia Internashonal di Museo 2023 a ranka sali durante e evento di Nos Zjilea na Mangazina di Rei. Despues di esei e museo di Parke Washington a tene un dia habrí dia 14 di mei. Dia 17 di mei Museo Chich’i Tan a duna un tayer tambe tokante pasamentu di informashon entre adulto i hóben. Dia 18 di mei Museo Terramar ta tene un dia habrí ku un seshon di informashon tokante e tema ‘Museo, Sostenibilidat i Bienestar’. Ta klousurá e selebrashonnan riba djasabra 20 di mei den kurá di SKAL ku un eksposishon di diferente museo. Entre 18:00 or i 22:00 or lo tin diferente diskurso ku algu di bebe i músika.

SKAL, Mangazina di Rei, Museo Terramar, FuHiKuBo, Museo Chich’i Tan, Museo Parke Washington (STINAPA) i Tanki Maraka ta organisá e aktividatnan pa e selebrashon akí.