Na momento cu e aña parlamentario 2025-2026 ta yega na su fin, Parlamentario di Fraccion di MEP y Presidente di e Comision di Finansas, Organisacion Gubernamental, Cultura y Deporte (CFOCS), drs. Shailiny Tromp-Lee, ta expresa su profundo decepcion cu e manera cu e control parlamentario y e trabou di e comision cu e ta lidera a keda seriamente obstaculisa e aña aki.
Segun Tromp-Lee, e overzicht di e trabou parlamentario di e aña cu a pasa no ta un simpel documento di estadistica, sino un refleho preocupa di e funcionamento di nos sistema constitucional. Maske cu e Comision di Finansas (CFOCS) cu e ta presidi tabata e comision mas activo y a organisa 15 reunion. Tromp-Lee ta indica cu e por a haci hopi mas pero den su trabou a keda topa cu muraya di desinteres y falta di cooperacion di parti di e mandatarionan.
Ministernan ta ignora Cas di Pueblo
“E ta inacceptabel pa mira cu ministernan ta scoge pa no presenta ora nan wordo yama pa comision, of ta uza excusa cu departamentonan nos por bin pasobra nan ta ‘too busy’ pa bin rindi cuenta na Parlamento,” Tromp-Lee a duna di conoce. “Nos no por acepta cu ta trata e reunionnan di Parlamento como si fuera nan no tin prioridad. E falta di respet aki pa parlamento door di e ministernan aki tin cu stop.”
Si nos añadi e cifranan oficial di Parlamento pa e aña parlamentario aki, ta mustra un patronchi di silencio y boycot contra e derecho di control di e oposicion:
Reunionnan Publico den lachi: Di e 29 reunion publico cu a wordo pidi formalmente pa debati temanan crucial pa e pais aki, solamente 11 reunion a keda yama. Mas di e mitar di e peticionnan a keda hinca den lachi.
Vragenuur rechasa: Di e 8 Vragenuur cu a wordo solicita pa exigi cuenta di e ministernan, 2 so a wordo honra.
Preguntanan por escrito ignora: Di e mas cu 4,500 pregunta cu Parlamento a manda pa Gobierno, e ministernan a scoge pa ignora mas cu 2,600 di nan (mas cu 56%). Solamente despues di un carta di recordatorio di e Presidente di Parlamento , algun minister a core manda contesta cu nan tabatin di aña pasa.
Un apelacion pa cambio radical
Tromp-Lee ta enfatisa cu e actitud aki ta debilita e legitimidad di e Cas di Pueblo. “Democracia no ta e simpel hecho cu 12 voto ta mas cu 9. Democracia ta nifica tene debate, ta transparente y respeta e derecho di e pueblo pa via di nan representantenan. Un Parlamento cu no ta debati topiconan crucial, manera HOFA y e mocion unanime riba e desaroyo energetico y petrolero cu Gobierno ta simplemente ignora, ta un Parlamento cu ta perde su funcion primordial”.
Na final, e Parlamentario di MEP a haci un apelacion urgente pa e aña parlamentario cu ta drenta:
Mester cuminsa respeta e peticionnan y e rol di e fraccionnan di oposicion.
Ministernan mester respeta nos Staatsregeling, nan mester contesta preguntanan na tempo y cumpli estricto cu e codigo di conducta y e ley di integridad.
Mester duna balor na e trabou di e comisionnan y premia e debate democratico, en bes di paralisa esaki.
“Aruba merece un democracia bibo, transparente y husto. Como fraccion di MEP nos lo no keda keto y nos lo sigui vocifera y exigi e cambio cu e pais aki merece,” Tromp-Lee a conclui.