Aunke scuridad ta haci daño y destruccion, toch hende pa falta di conocemento, rebeldia y
desobedencia ta keda keto bay den scuridad y no ta haci caso na e palabra di Dios cu ta bisa:
Y esaki ta e condenacion, cu e lus a bin den mundo, y hende tabata stima e scuridad mas cu e lus
pasobra nan echonan tabata malo.( Juan 3;19).
Si nos wak rond di nos, cuanto hende cu conoce e berdad toch ta apoya scuridad,cuanto hende cu ta
mira hechonan di scuridad ta tuma lugar toch ta participa, pa motibo di amistad, politica,of
simplemente nan no tin cunes.
Cuanto hoben ta den scuridad y nan mayornan , ta consenti cu nan:
Nan ta sali sin ora di yega cas,
Nan ta keda drumi pafo sin ningun hende sa na unda nan ta keda,
Nan ta droga, bebe, bringa, cumpra auto, huur auto, horta, y ta participa den hopi bagamunderia, y e cos di mas tristo ningun hende sa di unda nan entrada ta bini, y te ainda mayor ta na sonjo.
Cuanto mayor ta haci nan yiunan dolor, haciendo cosnan inmoral, cu e muchanan tin cu soporta cu nan ta wordo di bully pa motibo di comportacion di nan mayornan, y te ainda e mayor no kier compronde cu ta basta cu bagamunderia, cu e cosnan ey ta causa dolor den e famia.
Esaki ta e luz berdadero, cu ta lusa tur hende cu ta bin den mundo.( Juan 1:9).
Hesus a bisa: Ami ta e lus di mundo, esun cu sigi Mi, lo no cana den scuridad, ma lo tin e lus di bida.
(Juan 8;12). Ora hende no tin e lus di Cristo nan ta cana den maldad, ladronicia, inmoralidad, den tur locual ta para scirbi den Romanonan 1;18-32, tur locual ta para scirbi den 2 Timoteo 3:1-5, tur locual ta scirbi den Galationan 5:19-21,tur locual ta para scirbi den 1 Corintionan 6:9-10 y nan lo no hereda e reino di Dios si nan no arepenti y bini na e lus di Cristo.
E lus di Cristo ta un necesidad pa bida di tur hende, pasobra e ta para scirbi den Juan 3:16 bon cla cu
esun cu kere lo ta salba, ma esun cu no kere lo ta condena.
Awor kico ta nifica condena?
Tur hende condena segun ley mester bay prizon, awel tur esnan cu ta condena lo tin morto eterno den fierno esey ta condenacion si nan no arepenti y bini na Cristo,y tur esnan cu kere lo tin bida eterno den Cristo Hesus, y esey ta conta pa tur hende na mundo, ta imposibel drenta cielo sin Cristo Hesus.
A yega tempo pa tur hende sa e berdad, pasobra Cristo Hesus no ta un Religion, e ta nos Salbacion, y
sin dje nada no por funciona, aunke con moderno mundo bira.
Pasobra antes boso tabata scuridad, ma awor boso ta lus den Senjor, cana como yuinan di lus, pasobra e fruta di lus ta consisti di tur bondad y husticia y berdad.( Efesionan 5:8).
Ningun hende no por predica nan mes, tur hende mester predica Cristo, y duna tur honor y gloria na
Dios, kende ta Todopoderoso, y tin tur cos den su man.
Pesey mescos cu boso a ricibi Cristo Hesus e Senjor ,asina cana den den dj’E. ( Colosensenan 2:6).
A yega tempo pa predica e evangelio mas cu nunca, pa hiba e gran comision, cual ta un mandato di
Dios pa nos tur.
Bo palabra ta un lampi pa mi pia, y un lus pa mi caminda.(Salmo 119:105).
Pastor Marcel Balootje.