Lidernan sindical cu a participa den e manifestacion pasivo durante bishita di Rey Willem-Alexander ta confirma cu e accion a logra su proposito principal: haci e voz di trahadonan y pueblo di Aruba wordo tende, inclusivo na Hulanda.
Presidente di sindicato TOPA, Axcel Figaroa, a expresa su satisfaccion cu con e dia a desaroya y a enfatisa cu e accion a duna resultado concreto. Aunke e protesta no tabata masivo, e impacto a keda cla y e mensahe a logra yega na e autoridadnan corespondiente.
Mesun linea di pensamento a wordo comparti pa presidente di sindicato STA, Diego de Cuba, kende tambe tabata presente durante e manifestacion. El a indica cu e situacion actual ta pidi reflexion serio di parti di tur ciudadano Arubiano.
Segun De Cuba, ta importante pa comunidad para un momento y analisa e efecto di e legislacion di Reino, specificamente e Rijkswet, cu segun su criterio no ta faborabel pa Aruba. El a enfatisa cu tin necesidad pa mayor consciencia y dialogo riba e impacto di e tipo di decisionnan aki riba futuro di e isla.
E participacion di diferente sindicatonan den e accion pasivo a reforsa e mensahe comun: e preocupacionnan di e sector laboral ta serio y ta merece atencion, tanto na nivel local como den Hulanda.