Awe mainta trahadonan di Departamento di Infrastructura y Planificacion (DIP) a dicidi cu ta basta y a pone trabou abou. Esaki a sosode den oranan trempan di mainta.
E trahadonan ta hopi disgust cu maneho di nan director cu no solamente no ta haci su trabou manera debe ser, pero tampoco ta trata e personal bon, no ta respeta nan y nan ta sinti cu e ta tuma decisionnan no corecto cu por afecta e departamento.
Nan a manda un carta pa prome minister, kende ta encarga cu e cartera di infrastructura, pa un reunion hunto cu e director pa expresa nan malcontento. Sinembargo te dia di awe no a haya contesta. Inclusive nan sindicato SEPPA tambe a manda un carta pa e mandatario cu e peticion aki pero tampoco a haya contesta.
Di antemano e trahadonan a bisa cu nan buchi a yena y lo no wanta e situacion hopi tempo mas.
