Parlamentario Shailiny Tromp-Lee a expresa preocupacion serio riba e forma cu e proceso di e propuesta di Rijkswet HOFA a wordo maneha. Segun e parlamentario, tanto Gobierno di Aruba como Gobierno di Hulanda a pasa riba reglanan constitucional y proceso legal cu mester wordo sigui den un asunto di tal importancia.
Tromp-Lee a indica cu te na awe Gobierno di Aruba no a informa Parlamento oficialmente riba e desaroyo y contenido di e ley di Rijkswet HOFA. E proceso a cana “tras di lomba di pueblo di Aruba y tras di lomba di Parlamento di Aruba”, sin debate habri ni aprobacion formal.
E parlamentario tambe a critica e rol di Hulanda den e asunto. Segun Tromp-Lee, Hulanda regularmente ta interveni ora cu ta existi preocupacion riba maneho di finansas publico na Aruba, inclusivo cu instrumento manera un Koninklijk Besluit (KB). Sinembargo, den e caso actual, Hulanda no a interveni apesar di e preocupacionnan riba e proceso di e ley cu no a cana corecto.
“Hulanda normalmente ta actua ora cu tin sospecha di iregularidad den finansas. Pero den e caso di Rijkswet HOFA, unda e proceso mes ta genera pregunta riba su legalidad y transparencia, nos ta mira cu Hulanda no ta para e desaroyo,” pero ta dies sigui un proceso cu ta na altura ci no ta corecto.
Segun e parlamentario, e hecho cu e documento ya a wordo presenta na Rijksministerraad (RMR) sin aprobacion di Parlamento di Aruba ta crea duda serio riba e manera cu e proceso a wordo conduci. Nan ta cuestiona si ta existi un dobel criterio den e forma cu Hulanda ta evalua situacionnan politico y financiero na Aruba.
Tromp-Lee a plantea pregunta riba si e propuesta di ley tambe por tin implicacion pa autonomia di Aruba dentro di Reino Hulandes. Tur proceso legal y constitucional mester wordo respeta, specialmente ora cu ta trata di legislacion cu por tin impacto grandi riba e relacion institucional entre paisnan den Reino.
Ademas, e parlamentario a señala cu Gobierno di Aruba tampoco a informa Parlamento riba e puntonan di negociacion cu ainda tabata pendiente. Parlamento anteriormente a duna un mandato claro pa Gobierno negocia cierto aspecto di e propuesta, pero segun Tromp-Lee, no tin informacion publico riba kico a pasa cu e puntonan aki durante e negociacionnan.
“Parlamento y pueblo di Aruba tin derecho di sa con e proceso aki a cana y kico ta e posicion real di Gobierno riba e puntonan cu nos a manda nan negocia,” Tromp-Lee a conclui.
E discusion riba Rijkswet HOFA ta riba e posibel impacto financiero y institucional pa Aruba, incluyendo e rebaho di interes y e condicionnan cu por acompaña e ley dentro di Reino Hulandes. Parlamento ta busca mas claridad y transparencia prome cu por tuma cualkier decision definitivo riba e propuesta. Un desicion cu Gobienro di Aruba a tuma y RMR a tuma sin conscientisacion di Parlamento di Aruba , dus e pueblo di Aruba a wordo traiciona door di Gobierno di AVP-FUTURO y e propio RMR di Hulanda ?