Prome Minister mr. Mike Eman hunto cu Minister mr. Gerlien Croes y Minister drs. Mervin Wyatt-Ras a tene un encuentro cu sr. Ugo Blanco, Representante Residente di United Nations Development Program (UNDP) pa Aruba, Corsou, Sint Maarten y Trinidad & Tobago. E bishita aki ta reconecta e cooperacion strategico entre Gobierno di Aruba y UNDP, pa cu e Obhetivonan di Desaroyo Sostenibel (SDG’s) di Nacionnan Uni.
Durante e encuentro, sr. Blanco a cera conoci tambe cu varios otro minister di Gabinete AVP–Futuro y a expresa su aprecio pa e rumbo cu Aruba a tuma den su agenda nacional pa integra e SDG’s como pilar fundamental pa progreso socio-economico. Segun Blanco, UNDP ta considera su rol como un partner strategico esencial pa yuda e pais logra e metanan crucial.
UNDP tin hopi aña caba trahando cu Aruba, compartiendo data importante pa yuda Gobierno den crea maneho cu ta basa riba evidencia, por ehemepel den turismo, reduccion di pobresa, energia renobabel, maneho di desperdicio y mas.
Prome Minister Mike Eman a enfatisa cu durante Gabinete Eman II, a logra sigura fondo for di Union Europeo pa desaroya e facultad di Green Energy, cu e gobierno anterior a dicidi di yama SISSTEM. E iniciativa aki a nace for di e vision pa prepara e generacion nobo pa carga e aspiracion cu Aruba a formula pa bira un pais lider den sostenibilidad, energia limpi, y desaroyo integral.
UNDP tabatin un rol di supervision den e renobacion y construccion di e facultad SISSTEM, particularmente den aspecto arkitectonico y tecnico. Awendia, e facultad ta completamente operacional y ta forma un pilar educativo importante den Universidad di Aruba, preparando studiantenan pa contribui activamente na e transformacion sostenibel di nos pais.
Sr. Ugo Blanco a keda impresiona cu e nivel di infrastructura y curiculo di Universidad di Aruba, y ta considera UA como un di e universidadnan mas bunita, moderno y sobresaliente den region.
E reunion ta marca un paso importante pa reconecta cu e Gobierno nobo, den cuadro di colaboracion pa logra e SDG’s, pero tambe pa evalua e progreso realisa cu e facultad SISSTEM, como un ehempel di loke un aliansa entre gobierno y organisacionnan internacional por logra.
