Hopi hende ta canta di e bondad di Dios, hopi ta papia di dje, pero laga nos tuma un tempo y puntra nos mes te na unda e bondad di Dios ta alcansa.
No tin nada mas bunita, precioso y mas grandi cu e bondad di Dios.
Wak cuanto maldad hende ta haci, wak cuanto maldad hende ta programma, hende ta haci malo contra otro y hasta ta haci malo contra nan mes, manera nan no ta ripara cu ta malo nan ta haci.
Hende ta coba buraco pa otro cay aden pero no lubida cu ora bo coba un buraco pa otro, ta bo mes ta
bin cay aden.
Pero en cambio, Dios ta sigi cu su bondad, su misericordia, su amor, su compasion ta wordo mira tur dia riba e mundo aki.
Hasta ora hende ta haci malo, Dios ta saca bondad for di dje, pa demostra Su amor y Su poder, pasobra E ta todopoderoso.
Den Marco 10:18 Hesus ta bisa: Pakico bo ta yama Mi bon,Ni un hende no ta bon, sino Dios so.
Pesey laga nos tur imita e humildad y bondad di nos Senjor Hesus Cristo, no laga nos rechasa otro, no laga nos tira piedra sconde man, no laga nos paga malo cu malo, no laga nos trece division, no laga nos discrimina, pero laga nos imita Dios den su bondad, pasobra su bondad ta kibra tur obstaculo den nos caminda.
Bo tabata sa cu hasta den bo sonjo Dios ta cuida bo?
Bo tabata sa cu ta Dios ta cuida di bo hogar, bo matrimonio y bo famia?
Bo tabata sa cu ta Dios ta cuida bo riba caya den e trafico insigur?
Bo tabata sa cu bo curason y bo rosea ta den man di Dios?
Efesionan 3:19-21 ta para scirbi; Y pa conoce e amor di Cristo cu ta surpasa conocemento, pa boso wordo yena cu tur plenitud di Dios.
Awor Esun cu ta poderoso,pa haci tur cos mucho mas abundantemente, di loke nos ta pidi of pensa, segun e poder cu ta obra den nos. Na dje sea gloria den e iglesia y den Cristo Hesus den tur generacion pa semper y semper.Amen.
Lanta mainta cu e pensamento pa haci bon, y no laga ningun hende usa bo como instrumento pa haci malo.
Lanta mainta papia bon, desea bon, pa bo mira bon, sembra bon pa bo mira bon, pasobra tur locual hende sembra nan lo cosecha.
Papia bendicion na cas, riba caya, y especialmente na bo trabao, pasobra bendicion ta yama bendicion,mantene bo mes fiel na Dios, y lo bo wordo recompensa.
Critica bo ta hanja tur caminda, pero for di critica nos ta sinja saca locual ta bon y abstene di locual ta malo, Cristo Hesus a wordo critica haciendo bon, e a wordo maltrata haciendo bon, e a muri na crus haciendo bon, pesey nos ta mira cu e bondad di Dios ta incomparabel.
Wak kico Dios ta bisa nos den Isaias 41:10.
No tene miedo pasobra Mi ta cu bo.
No desmaya pasobra Mi ta bo Dios.
Lo Mi fortalese bo, si lo Mi yudabo.
Si lo Mi sostene bo cu mi man drechi di husticia.
Esaki ta conta pa tur hende cu ta busca Dios, cu ta haci bon, pasobra nan lo mira e bondad di Dios.
Dios su misericordia ta grandi, y Dios ta pordona, y manera ta para scirbi den Hebreonan 8:12: Pasobra lo Mi tin misericordia di nan inikidadnan y lo Mi no corda nan picanan mas.
Senjor ta fiel, Senjor ta husto, Senjor ta Dios, yena cu bondad.
Pastor Marcel Balootje.