Universidad di Aruba ta haya importante pa reconoce studiante pa logronan academico y alabes otro cualidadnan manera, esfuerso, gusta yuda, bon actitud, liderazgo, tutoria, y colaboracion cu UA como tambe comunidad di Aruba. E cualidadnan aki ta engrandece confiansa propio, ta duna sentimento di logro, y ta genera respect den un grupo di compañe. Un sentido asina di logro ta stimula mehoransa.
‘Office of Student Affairs’ y ‘Office of International Affairs’ di Universidad di Aruba ta implementa un ceremonia pa reconocemento di studiante. E meta ta pa curasha studiantenan pa desaroya nan habilidadnan personal y profesional door di ta activamente envolvi den comunidad di UA y comunidad di Aruba en general.
Lista di studiantenan Embehador:
Joel Rainherc. SISSTEM
Joel Rainherc ta un studiante masha trahado cu un gran interes den sostenibilidad. E ta semper dispuesto pa asisti tur otro studiante y staf di e programa SISSTEM. E ta semper cla pa saca un man pa yuda. Joel ta promove SISSTEM y Universidad di Aruba paden y pafo di universidad manteniendo un bon record academico. E ta un berdadero SISSTEM studiante Embahador.
Timothy Fowler: FHTMS
Den palabra di su profesornan; ‘si bo puntra pa e profil perfecto di studiante, e contesta lo ta indudablemente Timothy Fowler. E ta berdaderamente interesa, curioso y cu hamber pa siña. E ta compronde cu exito no ta cuestion di tuma chens sino un producto di dedicacion y planificacion cuidadoso. E no ta djis acepta informacion na prome bista, e ta haci pregunta, analisa, y e ta busca e nificacion mas profundo di e mundo rond di dje. Den les e ta yuda su compañenan durante discusionnan aportando cu tremendo ehempel y splicacion. Pafo di les semper e ta busca pa yuda ora di ‘Open House’, actividadnan di voluntario y eventonan social. Pa loke ta eventonan social, nos ta admira su increibel talento pa duna serenata riba su guitara cu cantica di Kiss y no tin duda cu nos ta gusta su bunita cabey largo. Cu hopi orguyo nos a otorga e Studiante Embahador Reconocimento (Premio Studiante) 2022 – 2023 na nos studiante inteligente, respetuoso, y bondadoso studiante avanza, Timothy Fowler.’
Facultad di Ley su Studiante Embahdor 2022 – 2023 ta Abigail Medina:
Actualmente Abigail Medina ta studiante di tercer aña na Facultad di Ley. For di su prome aña, Abigail a participa activamente den comision di FdR PR como e desaroyado principal, e tabata di gran balor creando contenido y den maneho di e paginanan social di FdR PR. Banda di esey Abigail frequentemente ta sigui aporta y asisti den organisacion y coordinacion di eventonan. Abigail ta un studiante briyante y comprometi tanto cu su compañenan como cu staff. Bo por conta cu semper e ta cumpli. Pa e motibo aki, Facultad di Ley unanimamente a nomin’e pa e Reconocemento como Embahador.
OGM su Studiante Embahador 2022-2023 ta Jennyfer Geerman.
Jennyfer ta un studiante masha activo y dinamico. E ta semper proactivo y cla pa sostene e programa. Asina cu studiantenan tin un preocupacion, Jennyfer ta drenta den su modo di motivacion y den casonan specifico e ta drenta den su modo di atende cu e situacion pa yuda e studiante.
Jennyfer ta orguyoso di comparti su biahe riba nivel profesional y personal como studiante OGM cu otro studiante y publico en general. Despues di a asisti na e excursion educacional di OGM na Washington DC na 2019, Jennyfer su wowo a habri pa oportunidadnan nobo. El a dicidi di participa na un intercambio den exterior cu a motiv’e pa sigui cu su master despues di a gradua pa OGM. Universidad di Aruba ta felicita Jennyfer.
Universidad di Aruba ta gradici Jennyfer pa su contribucion y ta spera cu e sigui comparti su entusiasmo pa explora e mundo yen di posibilidad pa medio di oportunidadnan academico.
Social Work & Development su Studiante Embahador ta Shykia Maduro.
Shykia ta un studiante di Social Work & Development masha dinamico, motiva, y determina. A scoge Skykia como Studiante Embahador pa motibo cu semper el a demostra di ta un lider den e grupo, motivando, informando y guiando e studiantenan pa haci e maximo esfuerso den nan estudio.
Banda di esey Shykia tabata e representante di klas di Bachelor 3 y Bachelor 4 y semper a percura pa informa e studiantenan di tur loke ta concerni nan estudio na tempo y efectivamente. Pa añanan Shykia tabatin un prestacion academico increibel, no solamente pa loke ta su gradonan, pero tambe den planificacion, den habilidadnan di maneho y di traha den grupo y a haci un trabou excepcional durante su ultimo pasantia na Directie Voogdijraad. E ta gusta traha cu mucha y famia y e ta e definicion berdadero di un futuro trahado social di curason.
FEF su Studiante Embahador ta Jurrien Henriquez.
Jurrien a duna ehempel positivo na su compañenan di estudio, demostrando calidadnan manera disciplina, dedicacion y etica di trabou fuerte. Otro studiante ta admira y aprecia su comportacion. Su disponibilidad pa yuda otro y di ofrece yudansa pa loke ta material di estudio ta refleha un compromiso sincero pa sostene su compañenan durante nan estudio. Jurrien a yuda tambe UA cu su actividadnan riba medionan social. Como representante di su klas, e ta representa e preocupacionnan y interesnan di su compañenan, demostrando cu e ta merece pa tanto su compañenan como facultad confie y respet’e. Despues di a logra su propedeuse y a surpasa algun reto personal, el a demostra resiliencia y determinacion. El a demostra esaki durante su participacion na e tayernan di desaroyo personal y profesional reflehando su compromiso pa autodesaroyo. Recientemente Jurrien a acepta e reto nobo di asistente di studiante pa e facultad. Facultad di FEF ta sumamente contento di tin Jurrien abordo y ta premira un aña di traha hunto fructifero. Jurrien ta un atkisicion pa UA y e comunidad di studiante. UA ta desea Jurrien exito cu e bunita trabou y ta felicit’e cu su reconocimento como Studiante Embahador.
Reynier Faro ( Office of Internatioal Affairs)
Reynier ta un hoben ambicioso cu un toke suave pero di caracter fuerte. E ta tambe masha servicial. Asina el a ofrece su mes como voluntario na e departamento di Asuntonan di Exterior y na actividadnan di Open House. Inspira pa e experiencia y guia di Darlene Alias, el a dicidi di pasa un semester den exterior na Grecia. Despues di su pasantia Reynier a regresa Universidad cu habilidadnan nobo y experiencia, asina el a wordo contracta pa traha denoficina di Students Affairs & Marketing. Reynier a sobresali den su papel y ta awo un atkision pa e grupo.
Reynier ta un ehempel perfecto di loke ta nifica pa ta un Studiante Embahador. E ta pasiona cu universidad, ta semper dispuesto pa yuda otro, y ta un ehempel positivo pa su compañenan.
Amanda Britten (Office of Student Affairs & Library)
Amanda ta un berdadero hoben cu ta inspira. E ta un studiante cu semper ta contento y ta cla pa yuda otro, y su creatividad ta sin limite. A pesar di a enfrenta algun reto Amanda no a entrega nunca y semper e ta cla pa haci un esfuerzo extra.
Actualmente Amanda ta den exterior riba un pasantia voluntario, compartiendo amor y cuidando otro hende. Esaki ta solamente un ehempel di su hopi actonan desinteresa, amabilidad y compasion.
Amanda ta un inspiracion pa tur hende na universidad. E ta demostra cu ta posibel surpasa cualquier obstaculo y logra nos metanan, no obstante nos retonan. E ta siña nos tambe e importancia di duna bek na nos comunidad y haci un diferencia den bida di otro.
Banda di e studiantenan, dos organisacion estudiantil a ricibi un premio tambe, cual tabata Aruba Leo Delta Club. Nuctua, Circle K International club (Kiwanis) y e UA Sport Team.
Prome cu finalisa e anochi, Mr. Martin Hersz y docente di musica Jaderick Croes a dedica e “brand story” di Universidad: “With the University of Aruba, #UAchieve” den un forma espectacular.
Finalmente, masha pabien na tur studiantenan y danki na e commission organisatorio di Student Ambassador Awards. Danki di curason na tur nos sponsors: SETAR Aruba, Giannis Group of Restaurants, Aruba Bank, WEB Aruba, De Palm Tours N.V., CATC,Kulture Café, WOW cosmetica
