Willemstad, Corsou
Despues di tres anochi sigui di disturbio, sakeo y kimamento, gobierno di Corsou a pidi aprobacion di Gobierno di Reino, pa permiti militarnan duna sosten na Cuerpo di Polis di Corsou den un intento pa calma e situacion y trece trankilidad.
Manera ta conoci for di diaranson anochi despues di un manifestacion di trahadonan di Serlicor, a sigui disturbionan anochi den cayanan di Punda y Otrabanda, caminda fuera di a kibra di sakea varios negoshi, e manifestantenan a cende varios candela na diferente sitio.
Esaki a pone cu diahuebs mes gobierno di Corsou a decreta un toque de queda cu tabata na vigor pa 10 ora largo pero asina mes e kimamento, hortamento y destruccion, a continua den algun caso hasta confrontacion cu polisnan.
Diabierna atardi caba un grupo di oficialnan di polis di Aruba a biaha pa Corsou pa sostene polisnan di e isla pero mirando cu e situacion tabata bayendo den un direccion cu e lo por escala ainda mas, ayera mainta gobierno di Corsou a dicidi di tuma un paso mas drastico.
Despues di a haci e peticion ia Gobierno di Reino, esaki a bay di acuerdo pa permito personal militar pa asiste polisnan durante di e control anochi y tambe pa trata di evita e disturbionan cu ta tumando un rumbo cu ningun hende a spera.
Fuera cu Corsou ya caba tabata pasando den un situacion economico dificil, e crisis di covid-19 a empeora esaki ainda mas y awor cu e destruccion cu ta tumando luga, e pais ta sufri no solamente mas perdida economico y financiero pero na mes momento e tipo di actonan aki ta pone cu e pais lo bay pasa den mas problema pa lanta e industria turistico bek.
E noticia di e disturbionan ta bayendo den noticianan internacional y sin duda esaki ta un mal propagada pa e isla, mirando cu dentro di algun siman, varios aeroliña internacional, a dicidi cu nan lo cuminsa bolbe bula bek.
Pa hopi hende e disturbionan ya no tin di haber cu e situacion labor y financiero pero cu esakinan ta mustra di ta hayando un caracter politico, caminda for di diaranson caba a cuminsa pidi retiro di Prome Minister y retiro di henter e gobierno despues. Sinembargo loke ta un realidad cu cualkier gobierno cu tey eynan na e momentonan aki nada no lo cambia.
Tur cos ta mustra cu diasabra anohi mes militarnan a cuminsa brinda asistencia na cuerpo di polis den un intento pa calma e situacion y actua cu man duro contra di esunnan cu ta causando e desaster grandi aki.
No ta conoci pa cuanto dia e envolvimento militar lo ta of si lo evalua esaki segun e acontecimentonan diario cu polisnan lo confronta cu e disturbionan.
