ORANJESTAD,Aruba
Spearfishing ta otro tema cu Minister Marisol Lopez Tromp a trece dilanti den Parlamento diabierna ultimo y riba e tema aki tambe Minister di Husticia mr. Andin Bikker tabatin su reaccion. Den declaracion di Minister Lopez Tromp atrobe e la crea e impresion como si fuera cu lo kier a pone firma algo cu ta contra ley y esaki absolutamente no ta berdad. Den un reunion di Conseho di Minister cu Minister Lopez Tromp tambe a atende, Conseho di Minister a bay di acuerdo cu e gedoogbeleid cu a wordo traha basa riba conceptonan cu ta existi na Hulanda pa otro tipo di gedoogbeleid y basa riba richtlijnen di Tweedekamer. Si por corda na Aruba ya caba tin un gedoogbeleid pa pole fishing. Un par di aña tras, tabatin e problema di Lionfish cu a escala rond di Aruba, y e momento ey Ministerio Publico a duna un excepcion, un gedoogbeleid caminda personanan por a pisca cu pole spears riba Lionfish. E mandatario ta corda cu e mes a bay diferente celebracion cultural caminda tabatin sopi di Lionfish di e piscadonan cu tabata tremendo y hopi bon. E gedoogbeleid pa pole spears, por a haci spearfishing riba Lionfish. Minister Bikker un biaha mas ta lamenta cu Minister Marisol Lopez Tromp a crea un otro impresion y zwaai cu papel manera ta haciendo cosnan robes. Pa Minister Bikker esey no tabata necesario y di parti e mandatario, semper e ta un persona hopi zakelijk y hopi hende conoce Minister Bikker su manera di ta pa hopi aña. E mandatario ta splica cu e tambe por bay den Minister Marisol Lopez Tromp su pasado riba e buki di investigacion cu tabatin riba e periodo di gobernacion di 2001 pa 2009 pero no ta bay den e direccion ey. Ta di lamenta cu Minister Lopez Tromp ta purba desvia atencion pa cu e motibo cu a bay Parlamento pa pidi su retiro. Esaki siguramente no ta asina pero ta debi na e situacion cu no por traha hunto. Un comision independiente a constata esaki y tur esaki ta e motibo cu a enfoca den un reunion publico. Ta di lamenta cu ta ataca y purba tacha integridad di Minister Bikker y pa e motibo aki kier ‘set the record straight’, pasobra integridad di Minister Bikker ta algo cu e no ta laga ningun hende mishi cu’ne den un reunion publico. Minister Bikker no tabata presente den e reunion y no por a duna e otro banda di medaya riba esaki y ta p’esey Minister Bikker a haya ta necesario pa bin den un conferencia di prensa y set the record straight inmediatamente.