WILLEMSTAD, Curaçao
Djarason 12 di ougastus 2020, alrededor di 13.11 or, Sentral di Polis a risibi yamada tokante di un kaso kaminda un hende homber a kai for di baranka na ‘Vlakte San Pedro’ na altura di un di e molinanan na Tera Kora. Mesora a dirigi polis na e sitio. For di investigashon preliminar por a kompronde ku dos (2) homber tabata riba un baranka na e sitio menshona ta kohe koncha. Dado momento unu di nan a baha bai un poko mas abou, ku e konsekuensia ku un ola grandi a dale i bent’e den laman. Laman tabata hopi brutu esaki a pone ku el a konfronta difikultat ku landamentu i a bin hoga. E personal di helikopter di wardakosta a logra di saka e kurpa di Ruviendell Hose Ong A Kwie sin bida for di awa i trese tera. Ruviendell Hose Ong A Kwie a nase na Korsou dia 15 di oktober 1993.
Kaso di hogamentu na Korsou
