ORANJESTAD, Aruba
Manera a ser anuncia cu revista Focus lo bay adapta su presentacion pa e siguiente edicionnan, pues a yega e momento pa comparti cu hopi satisfaccion cu Focus Digital t’ey pa complace e demanda grandi di e lectornan. Den un forma nobo pa lesa su paginanan den un concepto innovativo, interactivo y facil. Como e pionero den su version electronico lansando su prome ezine na 2005 y 15 aña despues ta presenta un revista, cu ta e prome den su concepto unico na Aruba. Cu un contenido editorial actualisa, su fotografia impactante y un diseño creativo, ta hiba e lector na su revista faborito na alcance di un click.
E revista ta disponibel a traves di FOCUS App, cu ta acesibel via App Store of Android Google Play Store, cu por download e aplicacion aki riba un smartphone of tablet. E lectornan por lesa e revista facilmente for cualkier parti y na cualkier momento cu nan ta desea. Cu e aspectonan cu e formato digital ta ofrece, e ta un experiencia diferente con por ‘browse’ den e revista. Aunke e ta interactivo, Focus ta mantene e balans perfecto pa disfruta y lesa den trankilidad cada pagina. Tin un tutorial riba e prome pagina cu ta mustra con pa ‘browse’ den e revista, uzando e tecnologia den e plataforma digital.
E portada di e edicion di september ta ilustra Arnalda Lampe, cu ta comparti den su entrevista riba diferente faceta di su bida. Awendia como un muhe di 40 aña, e ta sintie mas stabiel, mas decidido y no tin miedo di nada. Esaki ta di tres biaha cu Roxana Effer ta den e revista y e gusta comparti su storia, paso el a siña hopi pasando den e enfermedad di cancer. E sexinista Geraldine Alexander durante su carera di 24 aña como bankero, semper a sinti un pasion den e area cu e ta eherce awendia exitosamente. Ataniro ta tira un bista bek riba su plannan pa 2020 y ki e pandemia a causa den su bida tanto personal como artistico. Por lesa mas entrevista interesante cu e.o: Jessica Wolter, Allan y Randy, Andrea Alfonzo, Sharissa y Edgardo, Martha Collell y Odillia.
Cu e plataforma digita cruzando frontera, Focus ta alcansa tambe e mercado di Boneiro y Corsou, unda ta papia e dushi idioma Papiamento. Cu e motto pa trece beyesa na bo bida, cu e flornan dibertido y unico, Ronald Coffy, a inicia cu e floresteria Petals Bonaire. Esaki despues cu el a profundisa su mes den e arte aki. For di Corsou tin Akisha Albert, cu a sali den Top 10 Miss Universe 2018, cu ta cumpliendo un otro soño cu e realisacion di e proyecto Management by Akisha. E ta kere cu Dios su tempo ta perfecto y no tabatin un miho ora cu aworaki, cu el a caba di colecta tur e experiencianan den e mundo di beyesa pa comparti nan cu otro hobencita.
E prome edicion di FOCUS Digital ta completamente ‘gratis’ pa asina tur e usarionan tin e oportunidad di cera conoci cu e revista. Ademas cu por download e revista digital riba FOCUS App, pronto por lesa gratis tambe e edicionnan anterior den e formato nobo. Por agrega revistanan faborito riba bo lista pa ta mas facilmente accesibel. Ta ricibi notificacionnan di e ultimo noticia- y edicionnan. Triple Z Publications ta gradici Leopold Lacle di Dot 1 Technologies y tambe Jose Angel Fajardo conhuntamente cu e team di FOCUS pa realisacion di e proyecto aki.
