KRALENDIJK,Bonaire
Riba Dia di Boneiru dos persona a risibí rekonosementu komo siudadano di honor. E dia aki ta e oportunidat perfekto pa gradisí nos hendenan pa e trabounan ku nan ta hasi pa komunidat. Den esaki méritonan personal i prestashonnan ku un balor speshal pa komunidat ta para sentral.
E aña aki a toka turno na Ezzard Franklin Florentino Semeleer, kariñosamente yamá Ezy. E rekonosementu ta pa su logronan riba tereno deportivo. Prinsipalmente pa e deporte di biar. E di dos persona ku a haña rekonosementu ta Rudolf Cornelio Maria Domacassé kariñosamente yamá Rudy. E rekonosementu ta pa su trabounan riba e tereno literario, teatral i deporte.
Diputado enkargá ku Kultura Nina den Heyer, na nòmber di Gobièrnu di Boneiru, a hasi entrega di un plaka di mérito komo muestra di apresio pa nan trabounan tan balioso.
