E departamento di Salubridat Públiko ta hasi un yamada na siudadanonan ku ta kontagiá ku e vírùs di corona pa nan mes informá nan kontaktonan di esaki. Ta pidi e kontaktonan akí pa paga bon tinu si nan tin òf ta haña keho. Si un di e kontaktonan akí tin keho, e konseho urgente ta pa keda kas i yama 0800 0800 pa un sita pa tèst.
Den algun kaso, kontaktonan mester bai tambe den karentena. Den e kaso ei, e departamento di Salubridat Públiko ta pidi e persona pa duna e kontaktonan ei un karta ku tur informashon. Último tempu spesialmente bou di hóben i mucha tin hopi kontagio. E departamenti di Salubridat Públiko ta tuma kontakto ku tur hende ku ta kontagiá ku e vírùs corona pa wak ken ta e kontaktonan ku posiblemente ta kore riesgo.
Pa motibu di hopi kos di hasi, e departamento mes lo no yama tur kontakto. Den mayoria kaso ta pidi e hendenan ku COVID-19 pa nan mes informá nan kontaktonan. Salubridat Públiko ta hasi e petishon pa sigurá ku ta informá e kontaktonan di un hende ku ta kontagiá ku e vírùs di corona mas pronto posibel. Esaki pa prevení ku un persona sin sa esaki ta pasa e vírùs pa otro.