Drs. Mervin Wyatt-Ras a tende di varios ciudadano durante y despues di e reunion publico regardando e contract skondi di LNG, cu nan a keda sumamente desapunta cu e actitud di minister presidente di Aruba, sra. Evelyna Wever-Croes. Aki ta trata di esnan cu a tuma nan tempo skucha e reunion pa sa con leu di nan hogar lo bai coloca pipanan di gas cu por explota y por destrui nan hogar. Den e reunion aki parlamentarionan hasta di coalicion a pidi pa haya e contract miyonario cu a ser firma cu Eagle LNG, comprometiendo nos pais pa 20 anja. Sinembargo te na final di e reunion, apesar di e mocion di colega parlamentario di partido Raiz, e contracto no a aparece. E contracto pues a keda SPOORLOOS.
E dos ministernan envolvi, Glenbert Croes y Evelyna Wever-Croes a duna di conoce cu nan no a ni mira e contract. Es decir a compromete Aruba pa miyones di florin durante 20 anja, segun nan, sin mira ni e contract.
Segun parlamentario Wyatt-Ras netamente awor cu nos pueblo ta pasando den un situacion dificil cu ta necesario pa gobierno por ta critico y bin cu perspectiva positivo y nos hendenan kier un aliento, ta firma un contract no pa 5 of 10 sino pa 20 anja, sin les’e y sin cu por contesta si lo tin rebaho di prijs di awa y coriente. Gobierno tampoco a dialoga cu nan propio partner den coalicion Raiz prome cu esaki. Esaki ta mustra riba incapacidad y falta di respet.
Wyatt-Ras a haya alabes masha mahos y bao nivel con e prome minister cu mester duna ehempel na pueblo gritando a expresa su mes den direccion di parlamentarionan di fraccion di AVP, yamando e miembronan di e fraccion aki pa nombernan denigrante manera entre otro hendenan sin gevoel, shishi, nazies y rabo sushi. Tur esaki paso parlamentarionan a cuestion’e fuertemente cu e no kier a duna e contract na Parlamento ni ter inzage. Dicho contract probablemente a ser firma bao su nanishi cu e compania di LNG. Wever-Croes y su colega Croes, ambos Croes por ganja nan coleganan di partido, pero no parlamentarionan di AVP.
Wyatt-Ras a cuestiona alabes si e contract di 20 naja aki sin garantia cu e prijs di gas lo baha, lo conduci na rebaho di prijs di awa y coriente y a cuestiona con sin consulta cu ciudadanonan, por bai instala pipanan di gas den barionan pariba di San Nicolaas, Brazil, Noord Cura Cabai, Zeewijk, Savaneta, Pos Chiquito y Barcadera. El a compara esaki cu e decision pa coloca molinanan di biento na Urirama. E ministro presidente tabata contra di esaki mientras cu awor cu ta trata algo pariba di Aruba e no ta ni worry cu e consecuencianan.
Ora argumentonan a caba e ministro presidente a bai over na su estilo di semper di insulta y denigra. Segun Wyatt-Ras respet semper mester tey, apesar bo contrincante tin otro opinion. Especialmente ora bo ta prome minister mester duna ehempel cu respet pa otro. Segun Wyatt-Ras manera un hende ta trata bo na trabou asina e ta tambe na cas. Tin un dicho: “bo por saca burico foi mondi pero bo no por saca mondi foi burico” cu ta conta den e caso aki. E ministro presidente a bolbe bek na su mala mania pa insulta hende. Wyatt-Ras den e reunion a trece padilanti cu e ta prefera di ser yama shouro paso e ta hende di pueblo y no cu e ta un persona cu ta sinti cu su mes mas cu otro y ta denigra y discrima otro. Esey ta conta tambe pa su coleganan di AVP. Ta con e sra. Wever-Croes aki lo ta na cas cu su famia? Wyatt-Ras no kier ta parti di su famia, paso ora e sra. aki no ta di acuerdo cu algo e ta cumisa grita y yama miembronan di su famia tambe pa tur sorto di nomber pa ofende. Ademas ta un berguensa pa Parlamento y nos pais ora personanan cu ta skucha reunion por tende un nivel asina baho di referi na otro persona.
Na final di e reunion tabatin 3 mocion, di cual 2 di nan tabata di fraccion di AVP hunto cu fracionnan di MAS y Accion 21. Un cu ta desaproba e LNG-deal y ta urgi gobierno pa disolve e contract aki y e otro ta un mocion di desconfiansa contra di e minister presidente. Esaki pa motibo di falta di transparencia, aparencia di nepotismo y favoritismo cu un un pa un ta un violacion di integridad.
E fraccion di Raiz hunto cu Mep a presenta e mocion pa haya e contract “ter inzage” y tur otro documento corespondiente, pa haci un assessment di medio ambiente y di e impacto social y alabes pa haya conseho juridico cu ora ta trata proyectonan di impacto grandi y di largo termino pa envolvi y haya aprobacion di Staten prome cu e esaki por sosode. E mocion aki ta mustra riba e incapacidad di gobierno y de facto ta duna gobierno un “brevet van onvermogen”. Evelyn Wever Croes pues no solamanet a haya un mocion di desconfiansa di fraccion di AVP pero tambe di su propio coalicion.