Den cuadro di e palabracion entre pais Aruba y Hulanda pa mehora e maneho financiero di nos Pais, a inicia den januari un estudio riba e maneho y ehecucion di subsidio na pais Aruba. Ta trata aki di e ehecucion di punto A3 di e tema Maneho Financiero di e ‘Landspakket.’
E meta di e estudio ta pa, entre otro, evalua e maneho actual di otorgamento di subsidio for di perspectiva di eficiencia, efectividad y legitimidad. Lo bay wak mas di cerca con implementacion di e maneho di subsidio ta tuma luga cu e meta pa por mehora esaki. E resultado di e estudio aki lo mester resulta den proposicionnan concreto pa mehora e sistema di subsidio na Aruba.
E estudio aki ta wordo haci den forma di un colaboracion entre expertonan di Hulanda y Aruba. Como prome paso lo acerca durante e dianan aki un grupo amplio di departamentonan clave pa asina ricibi nan perspectiva riba e tema. Tambe lo haci un investigacion mas profundo riba dato y material existente.
E siman aki Minister di Finansa y Cultura pa medio di un carta a pone 50 instancia cu ta ricibi subsidio di Gobierno na altura di e estudio aki y alavez pidi nan cooperacion pa realisa esaki.
Segun e agenda di ehecucion, e estudio aki lo mester ta cla pa 30 di juni 2022.