Tourism Corporation Bonaire (TCB) den koperashon ku Bonaire Hotel and Tourism Association (BONHATA) ke enkurashá i inspirá nos poblashon lokal pa skohe pa un karera profeshonal den turismo. E kampaña di konsientisashon ta forma parti di nos Plan pa Rekuperashon di Turismo (Tourism Recovery Plan) i ta sirbi komo un komponente edukativo pa trese nos poblashon lokal den kontakto ku oportunidatnan di karera den turismo.
E industria turístiko ta e industria di nos isla ku ta krese mas rápidamente, loke ta resultá den kreamentu di empleo nobo pa nos habitantenan. Resientemente TCB a finalisá un investigashon di inventarisashon di kamber, kaminda ta indiká e kantidat di empleo ku nan ta bai krea den e próksimo 24 lunanan. E análisis ku nan a ehekutá ta midi tambe e falta di personal pa funshonnan turístiko importante na aeropuerto, na nos hotèlnan, den transporte, den nos restorantnan i serka e proveedornan di aktividat na Boneiru.
Vishon di TCB ta pa yena e demanda pa personal ku hendenan di nos isla ku ta buska trabou. Pa e motibu akí a introdusí programanan manera ‘Tourism speed meet’ i e bolsa di trabou turístiko na Boneiru. Pa sostené e demanda kresiente pa personal kualifiká na nos isla, TCB huntu ku BONHATA a lansa un programa nobo di konsientisashon titulá ‘Turismo ta Sexy!’ pa enkurashá nos poblashon lokal i prinsipalmente nos generashon mas hóben pa eksplorá e oportunidatnan di karera den industria turístiko. E meta general di e inisiativa akí ta pa kompartí e variedat di trabou i oportunidatnan di karera den industria turístiko i trese nan bou di atenshon, engrandesé konsiensia i finalmente inspirá nos poblashon lokal pa aspirá un karera den industria turístiko.
‘Turismo ta Sexy!’ a nase despues di un diálogo di TCB ku hóbennan na nos skolnan lokal tokante nan persepshon pa loke ta trata trabou turístiko i kiko kada hóben kier a sa tokante e trabou diario den e industria akí.
TCB huntu ku BONHATA ta gradisí tur empresa i persona ku a sostené e proyekto i prinsipalmente e streanan den e industria ku a tuma tempu pa kompartí nan eksperensia ku nan trabou den turismo dilanti kámera komo parti di e kampaña ‘Turismo ta Sexy!’.
TCB a kompartí su promé mensahe pa medio di sigui sr Rugen Marinus kende ta traha komo instruktor di buseo na Toucan Diving na Van der Valk Plaza Beach Resort Bonaire. E ta konosí tambe komo Spider, ku resientemente a salba un manta durante su trabou.
TCB den koperashon ku BONHATA durante e próksimo simannan lo sigui diferente otro profeshonal den turismo i kompartí nan amor i dedikashon pa nan trabou.