Den cuadro cu reunion publico no.22 riba 1 di April, 2022 convoca na Parlamento di Aruba cu Minister di Enseñansa y Deporte relaciona cu presupuesto 2022, fraccion Accion21 a bini cu un mocion na ordo di dia cu ta subraya diferente punto enfocando riba e importancia riba yuda nos studiantenan na Hulanda pa sigura nan exito, stabilidad, y maneranan cu por soluciona problemanan cu ta aumentando recientemente.
Un mocion a wordo entrega por medio di fraccion Accion21, sosteni por medio di otro partidonan di oposicion, durante reunion cu Minister di Enseñansa y Deporte, sr. Endy Croes relaciona cu tratamento di presupuesto 2022. Considerando cu ArubaHuis su responsabilidadnan a expande considerablemente desde su fundacion, a bini cu e mocion aki pa por bini cu posibel solucionnan riba problemanan cu ta presentando pa nos studiantenan na Hulanda ya pa algun tempo caba y cu ta sigui aumenta sin ningun atencion adecua duna riba esaki.
STUDIANTENAN NA HULANDA MERECE MIHO
E cantidad di keho di parti di studiantenan na Hulanda ta sigui aumenta, riba diferente area relata na sosten socio-economico y mas. E sosten ofreci na studiantenan Arubiano ta keda deficiente segun Accion21 ta trece dilanti. Ta asina cu e dropout rate di studiantenan Arubiano na Hulanda ta riba 80%. E dropout rate tin efectonan devastador tanto pa e studiantenan Arubiano na Hulanda como tambe futuro di nos pais.
Pues den cuadro cu esaki, cu e mocion entrega den Parlamento durante reunion publico no.22, Accion21 ta urgi Gobierno di Aruba pa funda un organisacion sui generis encarga unicamente cu apoyo y cuido di nos studiantenan den exterior. Un otro punto crucial ta pa pasa cuido y sosten di studiantenan na Hulanda for di ArubaHuis pa e organisacion sui generis hunto cu e parti di presupuesto di ArubaHuis. Finalmente, ta urgi Gobierno di Aruba pa incorpora e fundadornan di Kompas den e organisacion sui generis a base di nan expertisio, dedicacion, tremendo preparacion y guia na bienestar di nos studiantenan cu ta bay Hulanda.