Durante tratamento di presupuesto 2022 den sala di Parlamento tabata tin hopi ataque personal y poco contenido. Bo lo kere cu un ley asina importante lo a wordo trata cu hopi mas seriedad. Corda bon cu e presupuesto ta e refleho financiero di bo maneho. Basa riba e alocacion di fondo nan bo por wak e prioridad di e gobierno.
Durante pandemia Gobierno a corta den salario (nan) di ambtenaar nan, trahador nan di NV’s di gobierno, fundacion nan y den enseñansa. A corta tur caminda menos den cartera di esnan cu ta cerca di partido. Y nos tur sa cu gobierno a sigui prioritisa friends & Family mientras pueblo ta sufri.
Si ainda tin hende cu ta kere cu e concepto di “Friends & Family” ta un slogan politico mi te kere cu e presupuesto 2022 a kita e ilusion ey. E begrotingspost di “Goederen en diensten” bou di gobierno di Mep-Raiz of mihor bisa e post di recompensa pa friends & family a subi cu 140 miyon florin, un RECORD!
A kita 12.6% di entrada di trahador nan publico, a corta den educacion, a corta den cuido medico, a subi impuesto y ta planiando mas subida den e presupuesto na di 2023 cu BTW.
Aki bo ta wak claramente cu e gobierno aki a perde tur sentimento pa e situacion di pueblo.
Pa trece e presupuesto bek den balans e Parlamentario nan di AVP a presenta un presupuesto alternativa cu ta pone e atencion riba e neceidad nan y beniestar di pueblo.
Den e presupesto alternativa AVP ta enfoka riba e echo cu nos cuidadano merece di biba un bida digno, un cuido medico accesibel, mehora poder di compra y percura cu muchanan incapacita ta haya e sosten y atencion cu nan tin mester di dje.
De e presupuesto alternativa di fraccion di AVP ta bin cu 4 proposicion concreto:
- Elimina e recorte di salario di 12.6%; esaki lo wordo financia dor di spar riba e gastonan di personal dor di un ehecucion adecua y sistematico di e “Beleidsplan Verlaging Personeelslasten”;
- Elimina e medidanan den cuido medico: Pais Aruba ta contribui di 24 miyon for di e begrotingspost “Goederen en Diensten” pa cubri e resto di 9 luna di 2022.
- Preveni y elimina e aumento drastico di schoolgeld di e scolnan cu ta resorta bow di SKOA y soluciona e problema di werksternan. Re-alocando 1.5 miyon di begrotingsopst “Goederen en Diensten”
- Introduci un bijstand pa famianan cu tin yiunan cu tin necesidadnan special. Cuido di mucha nan special tin peso emocional y fisico hopi grandi riba mayor nan. Segun Raad van Advies gobierno a pone e gasto nan di “Goederen en Diensten” mucho halto. Por usa e placa pa duna sosten na e mayor nan cu mucha cu necesidad special.
Aruba ta enfrantando tempo nan dificil y nos tin mester di liderasgo cu vision y curason pa su pueblo. Nos di partido AVP lo sigui lucha pa e bienestar di pueblo.