Recientemente tabatin sentencia di Casacion den un caso penl di inmoralidad. E homber Haime Trimon, a wordo condena tanto na Aruba como door di Hof. Sin embargo e no tabata di acuerdo cu ningún di e sentencianan aki Pero den Casacion tambe el a perde su caso.
E homber aki a wordo acusa cu dos menor di edad, kendenan ta nieta di su pareha. E ta nenga pero e dos mucha muhenan aki a declara cu e homber aki tabata yuda nan cu nan huiswerk. Despues di merdia, ta cera su curpa den camber cu e dos muchanan. Y ta na e momentonan aki e tabata mishi cu e menornan.
Tanto den prome instancia como den Hof Trimon a nenga di a comete e hechonan aki y a bisa cu esey ta e motibo pakico el a apela. Pero tanto den Prome Instancia como den Hof a dun’e cinco aña. Den Prome Instancia hasta un Hues di Corsou a trata e caso pasobra e ta swa di un Hues. Y el a wordo condena. Den Hof, tres hues a analisa su caso y a yega na e mesun conclusion di hues di Prome Instancia.
E no a keda contento y a bay Casacion. E instancia aki ta estableci na Hulanda. Nan no ta evalua contenido di e caso pa mira si e ta culpabel. Solamente nan ta evalua e obheccionnan cu e acusado a manda di e forma con Hof a atende cu su caso, cu puntonan cu no a tene cuenta cu nan of no a reacciona riba cierto puntonan di nan. Casacion no a haya cu su obheccion tin base y a rechasa esaki.Esey ta nifica cu e sentencia di Hof ta keda para, vigente. Pues cinco aña di prison.
Sinembargo e 5 añano ta cinco aña realmente. Tur preso na Aruba tin derecho riba libertad temporal. Esaki si nan no a haya nan mes cu problema den KIA y nan ta haya un reduccion di un tercera parti di nan castigo. Den e caso di Trimon e lo haya reduccion di 20 luna cu ta nifica cu e mester sinta solamente 40 luna cu ta 3 aña y tres luna. E caso aki a tuma luga durante dos aña ora cu e muchanan tabatin 6 y 9 aña. Trimon mes a wordo deteni na september, 2019.
Si tur cos bay segun e procedura normal, cu reduccion di pena, e ta nifica cu otro aña den luna di februari Haime Trimon lo ta afo, pasobra el a sinta caba e dos tercera parti di su castigo.
Tin voznan lantando pa kita e libertad temporal aki pa personanan condena den zedenzaak. Parce cu tin un comision cu a wordo lanta pa haci e peticion na Gobierno,
Haime Trimon castigo di 5 aña ratifica pero pa otro aña e por ta afo caba
