Diasabra ultimo a tuma lugar e Asamblea General di Comite Olimpico Arubano caminda n’e ocasion aki a opta pa tene e reunion na un forma diferente. Caminda cu normalmente ta reuni riba un anochi den siman, e biaha aki a opta pa tene e asamblea riba un diasabra mainta. Esaki a hasi posibel pa, banda di e aprobacion di e relatonan segun statuten di COA, reserva mas tempo pa dialoga cu e federacionnan miembro tocante temanan cu ta importante pa nan. Pa e ocasion aki a scohe pa debati tocante e situacion financiero, na nivel nacional y tambe na nivel internacional, cu ta afecta deporte en general.
Vice-Presidente di COA, Ivan Ng a habri e mainta, treciendo e puntonan di agenda dilanti 18 federacion cu tabata presente.
E prome parti di e asamblea a dedica na tratamento di e relatonan di aña 2021.
Secretaris General, Nicole Hoevertsz, a presenta e Relato di Actividadnan, den cua a resumi e actividadnan principal cu COA a organisa y cu a tuma lugar, y di ki forma a cumpli cu e seis areanan di prioridad cu a identifica den e Framework Strategico di COA.
Despues a sigui cu e relato financiero di aña 2021, cu a wordo presenta pa Ernst & Young y pa tesorero anterior, Sr. Edwin Roos.
Hunto nan a presenta e relato financiero, particularmente e desaroyonan cu a afecta e organisacion durante aña 2021.
Finalmente e federacionnan a aproba ambos relato cu unanimidad di voto, aprobando asina e maneho hiba pa Directiva di COA.
A sigui despues e segundo parti di e asamblea, cu tabata un dialogo tocante e situacion financiero cu ta afecta deporte. Resultado tabata un sesion sumamente interesante, interactivo y caminda a conta cu participacion amplio di e federacionnan. Motiva pa yuda cu ideanan creativo pa soluciona e situacion existente, e dialogo a produci proposicionnan interesante, cu lo wordo analisa awor.
Comite Olimpico Arubano a keda satisfecho cu e dialogo y e formato nobo cu a usa pa e asamblea. Intencion ta pa continua traha cu e federacionnan di e forma aki y discuti cada bes temanan di relevancia pa nan.
COA ta conclui un otro Asamblea General exitoso y ta gradici tur esnan cu a participa na e Asamblea.
E siguiente Weganan deportivo riba programa lo ta e Weganan Suramericano (Juegos ODESUR), Asuncion 2022, cu ta tuma lugar di 1-15 Oktober 2022 y pa cua COA ya ta preparando un delegacion pa representa nos pais dignamente.
