Entidat Públiko Boneiru (EPB) ta bai trese e puntonan di preokupashon for di e rapòrt di Greenpeace Hulanda, relashoná ku kambio di klima i vários senario di e potensial impakto na Boneiru, bou di atenshon di e ministerionan na Den Haag.
Gezaghèber Edison Rijna: ‘E rapòrt ta suprayá nos preokupashonnan. E problemanan ku nan ta deskribí den e rapòrt ta keda riba tereno di hopi departamento. Importante ta pa nos sòru ku Boneiru riba tèrmino largu por defendé su mes kontra kambio di klima. Nos ke hasi esaki pa medio di sigui kolaborá i dialogá ku e ministerionan. Huntu ku mi koleganan mandatario mi ta sigui hasi esfuerso pa pone énfasis riba urgensia di esaki.’
Diputado James Kroon di Naturalesa ta agregá: ‘E tópiko di klima ta haltu riba agènda serka nos. Durante nos bishita di trabou na Hulanda den luna di yüli último, nos a papia tokante e posibilidatnan pa establesé un Mesa di Klima na Boneiru, pa apsorbé e konsekuensianan di kambio di klima mas mihó posibel. Tokante esaki riba término korto ta bai organisá kòmbersashonnan di kontinuashon ku e diferente stakeholder i organisashon di interes.’
