E 3 organisadornan di Dande a uni y ta invita pueblo pa asisti na e Show y Festivalnan
Danki pa e cooperacion di Unoca y SETAR
Na Setar Seroe Blanco Comision Celebracion Dianan Nacional a presenta e proyecto di Dande 2022
CCDN:
Festival di Dande e aña aki ta conoce algun cambio di cual tur 3 organisador a traha hunto cu CCDN pa presenta 3 anochi di evento di Dande asina President di CCDN Lyonel Dirksz a informa durante un conferencia di prensa cu a tuma luga na Setar Seroe Blanco.
UNOCA:
Directora di UNOCA Ray-Ann Hernandez tambe tabata presente y ta hopi contento cu tin un partnership cu CCDN pa yuda engrandece tur 3 evento di Dande.
Show di Dande – Centro di Bario Brazil
E prome evento ta tuma luga 27 di december organisa pa Fundacion Chico Harms di cual pa 53 aña ta presenta un show di dande den e bario di Brazil. Sr. Chico Harms a menciona cu e show ta cuminsa 7 or di anochi y tin un= costo simbolico di 1 florin.
Festival di Dande Infantil y Hubenil
28 di december Comision Promove Cultura ta organisa e festival di mucha y hoben cu ta bay bek Centro di bario Tanki Lender. Festival ta cuminsa pa 6 or di atardi y entrada ta gratis asina e vocero di e comision Aaron Arenas a informa.
Festival di Dande Adulto
29 di december Fundacion Cultural di Festival Folclorico Dande y Himno y Bandera ta presenta e di 50 Festival di Dande den club Caiquetio cuminsando pa 6 or di atardi y e entrada ta gratis asina Jessica Croes di e fundacion a trece dilanti.
SETAR
Representante di Setar Kimberly Boekhoudt ta hopi contento di mira e union di cual sigur lo haci e celebracion di dande grandi. Setar semper ta contribui na e festivalnan di cual esaki lo bira e caso e aña aki atrobe.
Invitacion general na pueblo
Comision Celebracion di Dianan Nacional hunto cu Departamento di Cultura, Ministerio di Cultura y UNOCA ta invita henter pueblo di Aruba pa asisti na tur 3 evento dianan 27, 28 y 29 di december proximo. Ban biba y celebra nos cultura y tradicion.