Aruba Hotel & Tourism Association (AHATA) ta acumula e cifranan di ocupacion y prijs di hotelnan tur luna, y CEO di AHATA, Tisa LaSorte, ta raporta cu luna di December tabata mas exitoso na 2022 cu na 2019. Mientrastanto, e cifranan averahe pa aña 2022 ta indica cu ocupacion di hotel tabata menos cu na 2019, pero e RevPAR a recupera completamente. Pa motibo cu por cobra prijs mas halto pa camber desde pandemia, a logra casi mesun RevPAR cu na 2019.
DECEMBER 2022:
- Ocupacion: E grado di ocupacion tabata 84%; cual ta 2% mas cu na 2019.
- ADR: E balor averahe di cada camber bendi tabata $405.38; un aumento di 20% compara cu December 2019.
- RevPAR: E entrada averahe pa tur camber disponibel tabata $341.61, cual ta un crecemento di 22% compara cu December 2019.
AVERAHE DI AÑA 2022:
- Ocupacion: E ocupacion averahe pa ful aña 2022 tabata 75%; un recuperacion di 89% compara cu 2019.
- ADR: E balor averahe di cada camber bendi tabata $309.04, cual ta 12% mas cu na 2019.
- RevPAR: E entrada averahe pa tur camber disponibel tabata $231.89, cual ta mesun nivel cu RevPAR averahe di 2019.
Ta proyecta cu grado di ocupacion pa January ta bay ta 81%, un recuperacion di 91% compara cu nivel di ocupacion na 2019. Expectativa pa 2023 ta un recuperacion di 94% compara cu ocupacion di 2019.
TIMESHARE:
Ocupacion na propiedadnan Timeshare tabata 86% na December y e averahe pa ful e aña 2022 tabata 85%.
