Dia 25 di januari, esta diaranson awor nos pueblo ta recorda e fecha di nacemento di nos lider inmortal Gilberto François (Betico) Croes den feliz memoria. Si Betico ta na bida, e lo a cumpli 85 aña.
Tabata na aña 1994 cu e gobierno di e tempo ey, esta Gabinete Oduber II a decreta e fecha di 25 di januari como un dia oficial di Aruba; un fecha cu mester sirbi como reflexion pa e generacion aki y e futuro generacionnan keda recorda e gran estadista y luchador incansabel di e causa Arubano. Poco ta e politiconan den mundo cu Dios Todopoderoso ta manda cu un mision pa cumpli cu ne a base di nan talentonan special. Betico tabata un di e politiconan ey cu Dios a manda pa nos, un berdadero patriota y sirbidor di pueblo.
Sanger, sodor y lagrima
Desde añanan 30 di siglo pasa e pueblo tabata anhela y sclama pa Aruba tin su propio gobierno den Reino Hulandes y cu lazonan special cu Hulanda. Mas cu un politico a purba haci algo na e sistema politico/estatal cu nos pueblo tabata biba aden.
Sinembargo tabata te na aña 1971 cu nos lider stima Betico Croes a haya e inspiracion pa funda su propio partido MEP; un partido cu ideologia Social Democrata cu su promer meta tabata pa trece union den e comunidad Arubano y pa caba cu e politica di segregacion cu tabata existi entre partidonan politico di e temponan ey. Betico Croes tabata convenci cu e union aki, un union sin distincion di raza, districto, religion of color politico tabata crucial pa yega na nos libertad estatal, nos Status Aparte. For di e tempo ey un lucha tenaz, a base di sanger, sodor y lagrima a cuminsa pa logra nos derecho di autodeterminacion. Como un gran amante di libertad Betico a usa tur su talentonan y pone nan na disposicion di su pueblo. Hopi tabata e bochorno y humiliacion cu nos Libertador mester a wanta, tanto for di politiconan Hulandes, Antiyano como politiconan local cu no tabata kier a comprende su mision y tabata pone trampanan den su caminda pa obstrui e lucha sagrado aki.
Un gran patriota y inspirador
E momento di mas crucial den e lucha pa realisa e Status Aparte pa Aruba tabata durante e accionnan di Augustus scur na 1977. Nos Libertador Betico Croes a lidera e accionnan aki y ta danki na su insistencia, curashi y determinacion e politiconan Hulandes porfin a scucha kico realmente ta biba bao di e pueblo Arubano.
Betico tabata e lider di e masa cu tabata apela riba e sentimiento di patriotismo y cu constantemente tabata mobilisa e masa aki. Un y tur por corda e manifestacion masal den Wilhelminastadion na 1973, e marcha di flambeu na 1975, e inauguracion di himno y bandera na 1976, e Referendum na maart 1977, e demonstracionnan durante Augustus Scur 1977 y e yegada di e delegacion Arubano na maart 1983 despues di a logra e Status Aparte durante e Conferencia di Mesa Rondo. Na tur e ocasionnan aki Betico tabata e figura principal cu tabata inspira e multitud presente cu su discursonan impresionante. Betico Croes na varios ocasion a declara cu si su persona y su partido mester cana na margen di ley, e lo haci esaki basta cu e logra e ideal di e pueblo Arubano, esta e Status Aparte.
Curashi y determinacion
Hecho ta cu Betico Croes durante henter su trayectoria den politica nunca a duna su mes pa perdi, nunca a descurasha y su persona ta un ehempel bibo pa henter mundo, cu ora bo pone curashi, determinacion y sacrificio tras di bo metanan, bo ta logra esakinan.
Ta danki na e lucha tenaz di e Arkitecto, Constructor y Realisador di nos Status Aparte Betico Croes, cu entrante promer di januari 1986 nos a logra haya nos propio Constitucion, Gobernador, Conseho di Minister, Parlamento, Banco Central, Procurador General etc. Ta pesey e homenahe y gratitud di mas grandi cu nos pueblo Arubano por duna Betico ta di hisa nos bandera y canta e himno Arubano riba Dia di Betico, esta diaranson awor.
Partido MEP ta spera cu e memoria di Betico lo keda bibo den curason di cada Arubiano y cu tur aña e pueblo lo sigui recorda e estadista inmortal Betico Croes riba su fecha natalicio.
Pabien pueblo Arubano ariba Dia di Betico y corda hiza bo bandera di Libertad.
