Na principio di januari Stichting Monumentenfonds Aruba (SMFA) a cuminsa cu trabounan grandi di mantencion na e exterior di e edificio cu awendia nos conose como Algemene Rekenkamer Aruba cual ta un monumento conoci bou di e nomber di School 1888.
E edificio na Wilhelminastraat ta pertenece na un di e 16 monumentonan di cual SMFA ta doño y ta encarga cu nan mantencion y ta sigur un di esnan cu ta un reto grandi pa e fundacion. Na varios ocasion a inverti den mantencion y den corto tempo ta mira cu e edificio ta deteriora. E deterioracion aki probablemente ta causa debi na e cambio di material den pasado caminda cu a bay over pa pleister cu cement cual ta ocasiona cu e muraya no por respira y ta haci cu e piedranan den e muraya ta bay deteriorando poco a poco. Originalmente e edificio a wordo traha uzando calki.
P’e motibo aki Monumentenfonds Aruba a tuma e decision pa haci un test riba e edificio caminda cu lo substitui e pleister existente pa un pleister a base di calki. E verf cu lo aplica tambe lo ta uno a base di calki cu lo permiti e muraya respira.
Den e ultimo añanan Monumentenfonds Aruba a haci varios investigacion y cursonan tocante e tecnica di aplicacion di calki hunto cu expertonan di Merca y tambe di Trinidad y Tobago. Den proyectonan na e fornu di Kalki na Rancho y e California Lighthouse a haci uzo di e calki p’asna bay bek na e material original y esaki ta dunando un bon resultado.
P’e motibo aki a tuma e decision pa aplica esaki na e monumento School 1888 tambe.
Lo aplica e calki riba solamente un parti di e fachada y e resto di e edificio lo haya un mantencion regular mescos cu anteriormente caminda lo haci uzo di hoogoven cement.
Despues cu varios compania cu a participa na e cursonan di calki den pasado a entrega nan oferta pa e proyecto, e trabounan di mantencion a keda otorga na GPS Construction. Banda di esaki a haci un invitacion habri na otro companianan cu kier wak e proceso pa asina tambe por haya experiencia di e tecnica di pleister cu calki.
School 1888
E monumento di School 1888 a keda construi entre 1887 y 1888 y tabata diseña pa e chef di e departamento di construccion na Curaçao, Antoine Martis, den un estilo neoclasico. Originalmente e tabata e prome scol publico di Aruba. E scol tabata conocí e tempo ey bou di e nomber ‘landsschool’. Dia 5 di maart e scol a habri oficialmente. Na aña 1921 e scol a haya e nomber di Julianaschool y despues cu esaki a muda pa Madurostraat e nomber a cambia pa Prinses Margrietschool na 1943. Durante di Dos Guera Mundial e edificio a fungi manera un kazerne pa schutterij. E funcion di kazerne a trece hopi cambio cune na e edificio caminda a construi diferente partinan nobo. Entre 1953 y 1955 a renoba e edificio bieu y esaki a bira “Openbare Leeszaal en Boekerij” y despues di aña 82 a fungi manera oficina di gobierno.
Na 2005 a cuminsa cu restauracion y expansion di e edificio caminda cu a kita tur e partinan no original cu no tabata forma parti di e proteccion di e monumento y a haci un expansion di e edificio den un estilo mas moderno.
Ya pa varios aña e edificio ta oficina di Algemene Rekenkamer Aruba (ARA).
Durante e proyecto actual di mantencion, ARA lo keda den e edificio y SMFA kier gradeci e trahadornan di ARA pa e comprension y di antemano disculpa pa cualkier inconveniencia cu e trabounan di mantencion lo por trece cune.
Na final di e proyecto nan lo por conta bek cu un bunita monumento pa representanan. Cu e proyecto di mantencion aki SMFA ta sigui preserva e bunita monumento di School 1888 pa futuro.
