NCTVI a ricibi varios informe den e ultimo dianan di personanan cu a ricibi un mensahe via e-mail cu un carta den e anexo di e Agencia Policial Europeo EUROPOL of INTERPOL den cual nan ta wordo acusa di transmiti pornografia di mucha.
E carta ta firma pa un supuesto Alto Comisario di e Cuerpo Policial stranhero of uno di Aruba. Investigacion a revela cu e mensahe di e-mail aki ta completamente falso.
E carta, cu ta skirbi na Hulandes, ta bisa cu agentenan di departamento di criminalidad cybemetico a prueba cu e destinatario di e carta a intercambia imagennan indecente riba internet cu menornan di edad.
Esun cu ricibi e carta den su inbox, ta ser pidi pa tuna contacto cu e Alto Comisario menciona den e carta, lo mas pronto posibel, pa medio di un adres di e-mail di un Gmail account cu no ta e-mailadres profesional.
Si esaki no tuma luga den 24 ora, e texto conclui cu un ordo di detencion lo wordo emiti den contra di e destinacion.
Ta bon pa menciona cu polis of institucion nan hudicial nunca lo comunica tocante un investigacion den un forma asina. Ademas, e informacion menciona den e carta definitivamente no ta corecto.
NCTVI ta sospecha cu e criminalnan tras di e e-mail aki, lo ofrece un proposicion pa descarta e caso a cambio di un suma considerabel di placa.
NCTV I kier a enfatisa, cu si den caso tal ricibi un e-mail asina, pa por fabor sea asina bon di delete e e-mail aki mesora y no duna respuesta riba esaki.
Si tin mas pregunta of inkietud, nos di NCTV I lo atende bo libremente
