“Ku gran apresio Sra Davika Bissessar Shaw i Sr. James Finies – na nòmber di Bonaire Human Rights Organization (BHRO) a aseptá e honor pa medio di invitashon di e presidente di Komishon di Reparashon (CRC) di CARICOM profesor Hilary Beckles”
Sr. Finies a konfirmá e aseptashon di Bonaire Human Rights Organization komo Miembro Asosiá, na e reunion históriko di CRC tené dia 25 di aprel 2023, na nòmber di nos antepasadonan boneriano. Nos antepasadonan hasí katibu: famianan kompletu, hòmber, muhé i mucha. Tambe katibunan sentensiá, di nos islanan ruman antiano, ku mester a traha komo kastigu te muri den e saliñanan di salu di Boneiru. Ku un durashon di bida kòrtiku, ku nan sodó, sanger i lágrima, nan a kultivá, kosechá, yena barkunan i transportá míles i míles di tonelada di e “oro blanku” – salu, pa Hulanda, pa krese e pilá mayó di nan ekonomia, peska, kresiendo nan ekonomia i enrikesé nan pa nan bira un di e nashonnan mas riku na mundo. Tur esaki dor di “trabao pornada” di nos antepasadonan i nan bida di durashon kòrtiku den e plantashinan di salu di horor akí. Pa hustisia reparativo, nos, mas aleu a risibí i dediká e honor akí na nòmber di nos érue boneriano: Martis di Katalina Janga
Rekonosementu spesial:
Den su karta di invitashon na nòmber di Komishon di Reparashon di CARICOM, e presidente profesor Hilary Beckles “ta rekonosé e kontribushonnan signifikante di Bonaire Human Rights Organization den defensa di derechonan humano”
Deskripshon breve di Komishon di Reparashon di CARICOM:
E Komishon di Reparashon di CARICOM (CRC) a keda establesé siguiendo e desishon na e di trintikuater (34) Reunion Regular di Hefenan di Estado, ku a tene na yüli 2013 na Trinidad i Tobago. CRC a keda asigná pa proveé konseho, kordinashon di strategia general di aktividatnan nashonal i regional pa studia Reparashon. Ta implementá esaki pa medio di investigashon, edukashon públiko, preparashon di kaso legal i altura / montante di e dañonan, diplomasia, aliansa ku sosiedat sivil, partisipashon di hubentut i promoshon.
Esaki ta promé biaha den historia ku Boneiru tin representashon regional i internashonal pa derechonan humano na e nivel di CARICOM. BHRO ta mirando ansiosomente dilanti pa kuminsá traha ku e mentenan grandi di e Komishon di Reparashon pa trese prosperidat na nos gran region i pueblonan ku nos ta yama Karibe, komo ku nos tur ta kompartí historianan, desafionan, trauma i triunfonan komun. Apesar ku e kolonisadó hulandes a separá nos i ta kontinuá ta hasiendo esaki, komo ku nos tur a bini den mesun barkunan, nos a reuní atrobe komo bisiñanan regional, komo ku nos, durante añanan a enkontrá hopi di e mesun opstakulonan, a tumba e mesun murayanan, a konkistá e mesun desafionan. I di bèrdat, nos debe nos mes, un ku otro, pa rekonosé ku nos ta i semper tabata den esaki huntu.
