Ta masha hopi hende mes a bishita e “Open-Dag” na Marinierskazerne den curason di Savaneta recientemente, dia prome di Mei 2023. (Durante e temporada di Covid no tawatatin Open Dag.)
Hopi cos di mira y hopi cos di hasi. Nos muchanan a goza un mundo ! E biaha aki nos no a logra subi e boto Panter, pero nos a cana keiro y admira tur locual tawatatin rond di nos. Interesante tur e informacionnan ricibi na e booth di Parke Nacional Arikok. Ki bunita pa a wak e autonan clasico di 10, 20 , 30 of mas anja atras. Lady Ruth a “pose” banda di e Musical Classic Car color geel cu preto, e color di su dushi bario Dakota tur dia. Nos a sinta un rato bau di e tent grandi , dilanti na unda nan tawata bende cuminda, nasi etc., pero e stof lanta pa e biento a pone nos cambia di idea pa no para den rij y cumpra cuminda. E tent di “verf bo obra escogi” tambe tawata leuk. Un toke di arte y obranan cu palabranan positivo cu ta inspira . Nos a bin topa tambe cu e Poeta escritor Olga Buckley cu su buki “Bons slip”. Sigur un buki hopi interesante y gracioso pa lesa. E mercado liber di e Open Dag aki tawata colorido y hopi varia cu entre otro tasnan, t shirts y pechinan masha bunita.
Un di e bandanan musical cu a toca canticanan regea a cay na bon tera serca e publico cu tawata consisti di babynan den nan stroller te cu grandinan den rolstoel, y entre nan hobennan y adultonan mayor hunto cu nan yiunan, pasando tempo den y cu famia. Cu tawata hasi calor, sigur cu si cu nos dushi solo cayente, pero danki Dios cu biento suplando. Un of dos dia despues den oranan di anochi, nos a bay sinta na The Plaza Café disfruta di algo dushi di bebe y snoep nan dushi “bitter ballennan”, scuchando e dushi musica y canto di un di nos mihor cantantenan femenino di su tempo , e simpatico Sashah Figueroa. Ki bunita Sashah ta canta ! Su voz ta unico inigualabel !. Anto cu hopi variacion, manera Lady Ruth ta gusta ! Sashah ta un di e prinsesnan di e talentoso Martha Lacle , cu ta na cabez di su gruponan di mucha di canto y bayle Pierewietje y Flash. Ta di famia cu talentonan bunita, pasobra, su yui homber Angelo tambe ta exitoso den su canto y musica. Lady Ruth ta bay bek den tempo un rato y ta corda con e tawata toca e canticanan di Pierewietje hopi anja pasa na Radio Kelkboom den su programa Dushi Awacero Musical ariba Diasabra tray merdia di 2 pa 3 pm. Kemen, e yuinan di Martha Lacle y Oscar Figueroa ( dfm) tawata caba” super stars” chikito di edad hopi jong y awe ta cada un exitoso riba nan mes cu nan mesun estilo y nan mesun repertorio. Pabien na e hobennan adulto aki cu ta alegra hopi curason rond di nan, cantando cu alma y curason den nan tremendo voz. Ta hopi bunita cu tin mas di nos artistanan local cu ta presenta riba e stage dilanti The Plaza Café . Tur dia tin un otro artista ta canta. Ketobay Lady Ruth ta hanja falta si di e canticanan den idiomanan frances y brasileno, e.o. di Flora y Ariean de Bie cu a regresa nan Madre Patria Hulanda. Ta hopi ta corda nan hit grandi “ Het Jamanota lied” den 3 idioma : Hulandes, Ingles y Papiamento, un cantica cu ta pone turistanan yora hasta di emocion bunita . Tin di nos artistanan hoben di awendia mayoria biaha ta canta solamente den Ingles y Spanjo.
De ves en cuando bo ta tende un cancion na Papiamento. Ohala tur banda sinja toca y canta canticanan di Juan Chabaya “Padu” Lampe, manera “Abo so” of “Nami un chens”. Stima bo idioma, stima bo lenga materno Papiamento ! Nos ta termina nos relato di e siman aki, deseando Basha Foundation y e comishon organisador di e Prome Encuentro Internacional di Poesia cu a cuminsa e siman aki na varios lugar aki na Aruba tur clase di exito!. Tur hende ta bon bini. Nos palabranan di Bon Bini na tur nos Poetanan di exterior y cu nan hiba cu nan bunita recuerdonan di nos dushi isla cu inspiracion pa skirbi Poema pa Aruba y su hendenan amabel y carinoso.
Danki pa lesa nos relato cu amor y atencion atrobe, pasa un dushi dia yen di alegria y cuida curpa, mente y alma. Stay safe and love you too ! Un bearhug di Ruthy ! Y si bo tin extra “smiles”, regala un of mas persona cu no tin un smile ariba nan cara. E no ta costa nada y por alegra e persona of personanan ey nan curason !
