Nos Pais a celebra su multiculturalidad
Diadomingo cu a pasa, riba un Plaza Libertador Betico Croes completamente yen, a ser celebra e di tres Encuentro Multicultural. Un encuentro caminda gruponan di diferente Pais a sa di bini hunto pa asina duna un presentacion na honor di e Pais cu nan ta origina for di dje. Esaki ta di tres aña cu ta organisa e encuentro aki den cuadro di e dia Mundial di Diversidad Cultural pa Dialogo y Desaroyo declara pa UNESCO.
Tabata un anochi sumamente bunita caminda cu casi 30 grupo a participa, poniendo enfasis riba e lema di e encuentro aki cu ta pa nos pone e Arubiano na haltura di su cultura y pa siñ’e conoce di otro. Na e ocasion aki, Minister Xiomara Maduro di Cultura tabata presente pa asina hiba palabra y tambe disfruta di tur e bunita presentacion cu cada Pais a trece dilanti. Por a mira presentacionan den forma di canto y baile cu a haci e anochi aki uno sumamente excepcional mirando cu atraves di e presentacionan aki, esnan presente por a haya un bista tambe di con nan Cultura ta tuma forma y wordo expresa.
Na e ocasion aki, Minister di Cultura a duna honor y mustra su aprecio na e gruponan presente, entregandonan un reconocemento pa nan presentacion pero tambe pa a contribui na e encuentro aki.’ E rikesa di nos Pais ta den nos multiculturalidad.’ tabata palabra di e mandatario na final di e encuentro. Minister Maduro ta gradici Departamento di Cultura, Cuerpo Consular na Aruba, UNESCO Aruba y gruponan Artistico Folklore-Cultural aki na Aruba pa a organisa e evento multicultural aki.
