Minister di finansas Xiomara Maduro: Mike Eman no a stroba solamente e gobernacion pero a perhudica bida di cada hende cu ta naciendo na e momentonan aki na Aruba

Parlamentario Mike Eman den un conferencia di prensa a vocifera cu BBO na frontera ta un atraco den e cartera di e pueblo di Aruba. Segun Minister di Finansas Lider di AVP tin curashi debi cu danki na su persona Aruba tin un mega debe y e debe cu partido AVP a ocasiona bao di maneho di gabinete Mike Eman no a disparce durante di pandemia. 

Pandemia tambe a hunga un rol grandi di e debe banda di loke cu partido AVP a ocasiona cu ta e debenan cu Mike Eman a ocasiona Aruba mester paga. Segun minister di Finansas Xiomara awe cu Aruba mester tin  surplusnan aki ta pa motibo cu Aruba tin un mega debe cu a bira extra grandi cu placa cu mester a fia di Hulanda pa tur hende por a keda bon na pais Aruba y pa e economia keda drey. 

Na e momentonan aki loke cu Aruba ta trata cu ne tur dia ta locual cu Mike Eman a haci cu Aruba. Segun Minister di finansas Mike Eman no a stroba solamente e gobernacion aki, pero e la perhudica e bida di cada hende cu ta naciendo na e momentonan aki na Aruba. 

Si mester pone un ehempel, di locual cu Mike Eman a haci ora e tabata na turno, e daño cu e la haci ta perhudica e generacionnan cu tin na caminda pa tin un miho bida na Aruba. Ya caba tin dos generacion cu riba nan cabes sin cu a nace tin un debe pa bay paga caba danki na Mike Eman na momento cu a abusa di su poder na momento cu e tabata na mando. 

Minister Xiomara Maduro a expresa den conferencia di prensa cu Mike Eman tin hopi curashi na momento cu ta papia cu ta duna di conoce cu BBO na frontera ta un atraco den e cartera di pueblo.