Fraccion di PAR ta constata cu Minister di Salubridad sr. Silvania despues di presion di Parlamento, den luna di augustus, a duna oido i a para e decision pa kita vitaminanan for di e seguro basico. Un decision cu Minister Silvania tabata bon na altura di dje, for di mei 2023, si no mas tempran i e no a haci nada.
Pero miho laat, cu nunca! Cu sorpresa fraccion di PAR a tuma nota di e decision di SVB pa saca algun vitamina for di e pakete di cuido. Concretamente esaki lo a nifica cu e persona cu mester di e vitaminanan aki lo mester paga nan for di su propio saco.
Teniendo cuenta cu ta trata di complementonan cu ta necesario como parti di e tratamento pa personanan cu tin entre otro malesa di nier, Cancer, diabetes i hende muhenan embarasa, por ocasiona hustamente un escalacion di malesa i tambe gasto. Ademas e recorte di vitaminanan aki ta meramente 2,5% di e 52 miyon cu SVB mester baha na gasto.
Fraccion di PAR ta consciente cu ta necesario pa baha gastonan den salubridad, pero mester haci esaki caminda tin vet. Tin diferente ehercicio haci den e direccion aki, i den e ultimo cuenta anual di SVB e accionnan necesario pa continua cu esakinan ta keda describi. Ta den cuadro di esaki a lanta e ‘Taskforce Hervorming en Financiering Zorgsector’, cu ya pa basta tempo Parlamento no a tende nada mas di dje. Fraccion di PAR ta urgi Minister pa sigui cana e trayecto pa baha gasto den salubridad na un forma responsabel, eficiente i duradero.