Minister di husticia Rocco Tjon tabata presente na e apertura di inicio di e opleiding pa loke ta trata e introduccion di e wetboek van strafvordering nobo. Esaki sigur ta un momento hopi importante pa loke ta trata e cadena hudicial. Pa minister di husticia ta hopi importante pa inverti den e organisacionnan hudicial unda cu tin e materialnan pa eherce nan trabao, pero mes of mas importante e parti legislativo tambe ta importante pa ta regla.
Awe por bisa cuerpo di polis a inicia cu e proceso di e curso aki y na unda cu por bisa cu na maart 2024 Aruba como e prome pais den Reino Hulandes ta introduci e wetboek nobo aki. For di 2013 e proceso pa e wetboek nobo aki a inicia unda cu a instala un comision unda cu a entrega nan conseho na 2014 y esaki por a wordo entrega na Raad van Advies pero esaki no a tuma luga. Segun Minister di Husticia Rocco Tjon na 2018 minister di husticia e tempo ey Andin Bikker a entrega esaki na Raad van Advies pa un conseho y na 2020 parlamento a aproba e ley aki.
Segun Minister di Hustcia Rocco Tjon obviamente prome cu introduci e ley aki mester percura pa tin tur e condicionnan general, tambe mester percura pa tur esunnan cu lo bay traha cu e cambionan den e ley mester ta na altura di e cambionan den e ley. Ta bon pa tur esunnan cu ta traha cu e ley ta bon educa y cu ta haya un splicacion amplio di e materia.
Minister di husticia ta satisfecho cu e bin cu diferente comisionnan cu a elabora extensamente , e comision ta existi di ministerio publico, cuerpo policial, ministerio di husticia y asuntonan social y tambe Corte di husticia unda cu nan a bini hunto pa asina percura pa diseña e opleiding cu a caba di inicia.
Durante di dos siman universidad di Aruba hunto cu ministerio publico lo ta percura pa riba 200 persona cu ta traha den full e cadena ricibi e curso di e materia completo pa asina na maart 2024 tur e profesionalnan ta prepara y por inicia cu e proceso manera mester ta.
Esaki ta hopi importante paso e derecho di e victimanan a keda mas miho hancra den ley unda cu e ta bira mas facil pa nan por, durante casonan nan tambe tin e derecho awor pa comparti nan storia , pero tambe haya compensacion. Banda di esaki tambe a introduci metodonan nobo pa loke ta tools cu e polis den e caso aki cu ministerio publico por haci mas miho investigacion. Ta cambionan sumamente importante unda cu di e forma aki por combati criminalidad mas miho y asina sigui e reduccion den criminalidad manera cu ta mirando awo.
E Wetboek nobo ta haci Aruba mas reciliente di e situacionnan actual, pero tambe e ta tene cuenta cu fenomenonan pa futuro, por duna ehempel den e parti digital, cibernetico cu awor aki esunnan cu ta investiga e casonan aki ta bay tin mas tools pa asina percura pa e investigacionnan aki ta mas solido.
Pesey mes ta hopi importante pa pone placa disponibel pa por cumpra tur e materialnan pa e diferente organisacionnan pero loke cu ta hopi y of mes importante ta pa percura pa esunnan cu ta traha cu e ley aki den nan investigacionnan ta na altura di e cambionan cu tin den e Wetboek van strafrecht nobo, pa asina nan tin e base legal y cu nan por conduci cierto investigacionnan.
