Prome Minister Evelyn Wever-Croes hunto cu algun colega Minister Y Parlamentarionan, a asisti na e recepcion tradicional di aña nobo di Gobernador di Aruba Su Excelencia Alfonso Boekhoudt na Cas Ceremonial. Prome Minister a expresa cu Gobernador den su discurso a repasa aña 2023, cu tabata un bon aña den diferente sentido, y a expresa cu indudablemente lo tin retonan e aña aki tambe. Sinembargo, Prome Minister a enfatisa, hunto nos por enfrenta tur reto.
Gobernador di Aruba a cuminsa su discurso enfocando riba e bon relacion di Aruba cu e Famia Real, mencionando e bishita di Su Mahestad Rey Willem Alexander, Su Mahestad Reina Maxima y nos Kroon Prinses Su Alteza Real Prinses Amalia y e bishita na final di Aña di Su Alteza Real Prinses Beatrix.
Gobernador a pone enfasis riba e recuperacion y crecemento di nos economia despues di e pandemia y a elogia nos Gobernantenan, sector priva y tur NGO’s pa e bon trabou haci durante e crisis aki. Turismo a aumenta pa prome biaha desde e pandemia, esaki compara cu cifranan prome cu pandemia. Tambe el a remarca cu e economia di Aruba ta beneficia enormemente di esaki. Gobernador a enfatisa riba economia di nos pais bisando cu e crecemento den economia tambe ta significa un responsabilidad grandi pa Gobierno tene e finansas publico stabile y a referi na institutonan financiero mundial y CAFT. Basa riba e ultimo informe di IMF (International Monetary Fund), economia di Aruba a crece cu 8% durante 2023. Segun CAFT
esaki por yuda reduci debenan existente y tambe ta bon pa invercionnan cu lo yuda e crecemento ya existente y haci nos economia mas resiliente.
Tambe Gobernador a enfoca riba flora y fauna di nos Pais y a bisa cu mester haya e balance entre progreso responsabel y e cuido di nos naturalesa. Tin varios organisacionnan trahando duro pa cuida y preserva e naturalesa di Aruba. Por ehempel a regula e transito di vehiculo den Parke Arikok y tambe e proyecto di e re-
introduccion di nos lora a start y ta wordo vigila di cerca pa Su Alteza Real Prinses Beatrix. Nos naturalesa tambe ta un pilar importante di nos industria di turismo y sigur pa e turistanan y tur hende cu kier relaha y disfruta di esaki, Gobernador a menciona. Gobernador a sigui bisa cu e prosperidad di un pais no necesariamente significa bienestar pa tur hende. Tin varios proyecto y iniciativanan andando pa combati e pobresa y haya un balance. Esaki ta un tarea importante di e gobierno pero tambe di henter e comunidad. Nos tur por yuda unda nos por. Terminando su discurso Gobernador a papia di e importancia pa alcansa metanan, esaki ta cu union y respet pa opinion di otronan y tolerancia.
Prome Minister ta gradici Su Excelencia Alfonso Boekhoudt pa un discurso hopi bunita y inspirativo. E aña aki, Gobierno a declara como aña di Stabilidad y Prosperidad crea a base di inversion y innovacion.
“Meta di Gabinete Wever-Croes II ta pa nos logra establece un isla cu un economia productivo y stabiel, un pais cu por paga su debenan y alaves inverti den su futuro, pa crea oportunidadnan pa nos futuro generacionnan realisa nan soñonan. Un isla cu un desaroyo sostenibel y husto, cu por brinda un calidad di bida cu salud, progreso y felicidad pa un y tur, specialmente pa esnan mas vulnerable. Un comunidad cu ta trata otro cu respet, cu tolerancia y cu ta inclui tur hende den e progreso y prosperidad”, Prome Minister Evelyn Wever-Croes a expresa.
