Mayornan cu tin yiu chikito cu na 2024-2025 lo drenta klas uno (1) di scol primario, lo ripara un cambio na scol. Desde otro aña escolar lo marca e inicio di Alfabetisacion na Papiamento den klas 1 di e scolnan primario, na unda tur mucha cu drenta klas uno (1) di scol primario lo siña lesa y skirbi na Papiamento, anto siña Hulandes na un forma cu ta pas cu e mucha cu ta biba na Aruba.
Pa sostene e Directivanan di scol y nan scolnan pa haci e cambio aki, Departamento di Enseñansa Aruba (DEA) conhuntamente cu Centro di Desaroyo Profesional Continuo (CDPC) di Instituto Pedagogico Arubano (IPA), ta organisa seis (6) encuentro cu cabesante di scol y maestro di klas uno (1). Durante e encuentronan aki ta enfoca riba diferente aspecto importante relaciona cu e preparacion di e cabesante y e maestro pa cu e introduccion di siña lesa y skirbi na Papiamento y e acercamento nobo di Hulandes como materia.
E participante lo asisti na diferente tayer pa engrandece nan conocemento y profundisa nan mes riba e diferente aspectonan di e cambio. Banda di e tayernan, ta forma grupo chikito na unda cada grupo lo traha un plan. Dicho plan lo yuda cada grupo prepara debidamente pa e introduccion di siña lesa y skirbi na Papiamento y e acercamento nobo di Hulandes.
Diabierna ultimo (19 januari 2024) a tuma lugar e di dos encuentro cu a cana den hopi bon ambiente. Por a nota cu tin comprendemento di e cambio, animo y dinamismo creciente bou esnan presente. E informacion brinda ta pa yuda duna cabesante y maestro claridad y un mihor bista riba kico e cambio aki ta nifica den practica. Ta trata entre otro e material educativo pa Papiamento y Hulandes cu pais Aruba ta pone disponibel y e diferencia y similaridad entre siña lesa y skirbi na Papiamento cu siña lesa y skirbi na Hulandes. Na augustus 2024 e mucha cu ta
den klas 1 lo haya e oportunidad di siña lesa y scribi na Papiamento y lo siña Hulandes na un forma adecua pa un mucha cu ta biba den e comunidad multilingual di Aruba.
Di parti di DEA y CDPC ta gradici tur esnan cu a participa, pa nan tremendo empeño y tin tur confiansa cu lo sigui dal stap den bon direccion den e siguiente encuentronan.
Pa mas informacion relaciona cu Enseñansa na Aruba por acudi na nos website www.ea.aw.
Tambe por sigui nos den social media via nos facebook y instagram pages @educationaruba pa keda na altura di tur informacion.
