Ahaaaaaa! Awe nos ta conta boso un crenchi di nos “viaje” rond di Aruba, riba nos Dia Nacional, 18 di Maart 2024. Nos no a bay tur caminda na unda tawatatin bunita actividad, nos a keda pabao di brug. Pa cuminsa, Lady Ruth a lanta den oranan di merdia y no a alcansa wak e parada di e gruponan uniforma na televishon. Pero su casa Johan si a lanta mas tempran pa a hisa e bandera di Aruba. Un di e actividadnan na unda Lady Ruth a presenta, tawata e Diabierna dia 15 di Maart, prome cu nos Dia Nacional mes, na scol Reina Beatrix, na unda nos a tene un dushi “Zang uurtje” cu nos muchanan di klas 2, en total mas o menos un 45 mucha, riba invitacion di curason di lieve juffr. Christine. Nos a canta bay gol nos canticanan di mucha na Papiamento cu acompanjamento musical di mi tamburin. Pa privacidad di e muchanan, nos no lo pone potret den corant di e dushi mainta aki. Riba nos Dia Nacional mes, nos a bishita primeramente Biblioteca Nacional, tawatin dushi musica di e grupo di Rubin Ponson y como un bon Poeta semper inspira, Lady Ruth a cumpra un buki “Het land der letteren” pa solamente un florin, cu ta inclui poema tambe den dje y un bunita bando pa cabei traha na man. Nos a saborea un dushi juice di tamarijn cu nos a cumpra na e stand di lieve Josie, un di e muhenan fabulosa y nos a sali cu rumbo pa Fort Zoutman, na unda nos a topa nos amigo Poeta Leo cu ta Maestro di ceremonia tur Diamars y tambe na Poetry Night, cu a guia nan bunita programa dia 18 di Maart. ( Despues nos ta bin cu nos relato di Poetry Night y di e bunita anochi di Poesia dia 21 di Maart na Museo Cas Tan Tin.) Nos a drenta e museo Fort Zoutman y a admira tur locual tin eyden di nos antepasadonan di anjanan atras. Despues nos a sali cu rumbo pa Centro di bario Playa Pabao, na unda tawatatin super dushi ambiente cu varios bunita gruponan di baile. Eynan nos a topa cu e Poeta Lady Ari, (elegantemente bisti cu su blazer cora y sombre cu sjaal di Aruba), cu ya a recita su poema y cu ya tawata preparando pa sali pa Centro di bario Noord, pa su presentacion ayanan tambe. Despues di un di e gruponan di baile den CBPP, tawata Lady Ruth su beurt di recita poema, locual nos a hasi tambe cu hopi amor y pasion pa nos dushi Aruba y pa e dushi hendenan di Playa Pabao y vecindario y tur otro cu a bishita CBPP e dia aki. Contento di por a topa cu e bunita sra. amiga y sister Avelyn Jacobs, e esposa vda di pastor Sidney Jacobs (dfm), un shon di hende cu tawata hopi activo den su lodge tempo e tawata na bida. Nan prinses ta bayla den un di e gruponan. Net saliendo di CBPP pa continua cu nos “viahe” rond di Aruba, nos a wak e grupo di baile di Diana Antonette tawata bayendo pa subi e stage pa nan bunita presentacion. Cu nos bon amigo Nico Luydens ketobay den tou, cabayero activo baylador meymey di e damsnan bisti den nan outfit di folklore masha masha bunita mes. Di eynan nos a sali cu rumbo pa nos fabrica di Aloe den curason di Hato, na unda tawata tin super dushi musica di “Rincon Boyz” y aunke tawata tin hopi solo cayente, e bishitantenan tawata move, cumpra algo di come of bebe, of un of otro producto di aloe. Despues di a saca potret aki aya ariba e tereno extenso di aloe cu su productonan famoso gusta pa nos turistanan y nos mesun hendenan local, nos a sigui keiro den auto, rumbo Sta. Cruz pa sinti e ambiente eynan tambe un crenchi. Mientras nos tawata keiro den auto, nos tawata wak cuanto y na unda tin bandera di Aruba. Pasando den Piedra Plat, bayendo Sta. Cruz, pasando den Paradera, a nota cu no tawatatin bandera na Cas di Mito MFA Paradera, jammer. No tawatatin hopi bandera , leu leu un cas cu un bandera. (Nos no a bay tur caminda, nos no sa na unda tawatatin bandera di Aruba y na unda no, ta djies nos a nota cu no tawatatin na e edificio di MFA den Paradera). Pa conclui nos relato nos ta felicita e dinamico team di domino “Pluma Gang” representando e dushi bario di Dakota tur dia. “Pluma Gang” a bira campeon den e Torneo di domino Hymno y Bandera cu a tuma lugar na Plaza Status Aparte na Sta.Cruz . E team aki ta consisti di 25 cabayero hungador di domino di diferente bario, pero ta hunga y train regularmente na cas di famia Chang na Dakota y ta hunga weganan amistoso contra otro team. ( Nos a logra hanja un pic di dos di nan hungadornan). Un bearhug pa boso y pa tur nos lectornan di nos relato e siman aki, cu e bon deseonan pa salud, bon energia, alegria y sabiduria ! Shonnan, danki pa sinti cu nos un rato, e dushi alegria di nos Dia Nacional cu ya ta trai lomba.
Danki pa ta un pueblo ehemplar cu ta stima su hymno, escudo, su bandera y su dushi idioma Papiamento.
