Pa prome biaha Aruba lo participa na e certamen aki
Recientemente Prome Minister Evelyn Wever-Croes a efectua e acto di coronacion di Miss Supranational Aruba 2024, señorita Rashida Schmidt. Esaki ta e prome biaha cu Aruba ta participa na e certamen di Miss Supranational 2024 cu lo tuma lugar dia 6 di Juli na Polonia.
Rashida Schmidt ta un studiante di ley na Universidad di Aruba. Un mucha muher bunita, inteligente, y hopi bon prepara pa e certamen aki. Unda cu Aruba participa semper tin espectativanan hopi grandi y sigur Rashida lo ta un digno embahadora di Aruba den e certamen aki.
Prome Minister a expresa cu ta un honor y placer pa efectua e acto di coronacion di e prome Miss Supranational Aruba y cu e ta admira e dedicacion di e organisacionnan cu ta prepara candidatanan pa certamennan asina. E trabou ta grandi ya cu mester prepara e candidatanan cu abilidadnan y conocimento cu nan mester di Aruba y riba hopi otro tereno.
“Mi tin un respet enorme pa candidatanan cu ta prepara nan mes pa certamennan asina y mi ta desea Rashida tur clase di exito cu e lunanan su dilanti prome cu e certamen y sigur pa e certamen mes cu lo tuma lugar na luna di Juli”, Prome Minister a termina bisando.
