Libertad di expresion ta un derecho sagrado den un comunidad y ta parti esencial den un pais democratico. E ta un derecho clasico fundamental para den constitucion. Tur intento pa mina libertad di expresion, ta un atentado contra democracia. Na momento cu ta limita expresion liber di cualke ciudadano, grupo di ciudadano, organisacion of un periodista , nos ta papia di censura of violacion di libertad di expresion. Ora ta trata di exclui un of mas medio di prensa pa ricibi informacion ta papia di censura. Ora ta exclui ciudadanonan di un pueblo pa haña informacion di gobierno tambe ta papia di censura. Censura, exclusion y consecuentemente atentado contra democracia ta sosode cu cierto grado di regularidad den comunidad di Corsou.
Si no denuncia esaki hamas lo e sali na cla. Causa Prome ke mustra riba algun acto kondenabel aki na Corsou cu ta cay bou di atentado contra libertad di prensa.
E echo cu ta nenga un medio di prensa acceso den un sala caminda un gobernante ta duna informacion na prensa, ta un accion contra democracia. Pues na momento cu prensa no por participa na un actividad caminda un mandatario den funcion ta duna informacion ta nifica cu a limita prensa den su trabou di informa pueblo.
Un atentado contra libertad di prensa ta tambe ora un mandatario den funcion invita no tur medio di prensa pero solamente algun di su preferencia.
Un ehempel di exclusion y atentado contra libertad di expresion ta censura di contenido di e informacion cu ke duna pueblo. Un mayoria grandi di prensa sa censura contenido di comunicado.
Violacion di democracia y libertad di expresion ta culmina den temporada di eleccion. Ta net den temporada di eleccion mester tin espacio de sobra pa partidonan por forma y informa e pueblo votado cu ta para dilanti un decision importante pa su futuro. Dunamento di informacion den temporada di eleccion ta ser torpedia malamente pa prensa aki na Corsou.
Esaki ta represhon fundamental di e derecho y libertad di expresion. Den temporada di eleccion prensa ta solidario y ta cera cabes subi prijs barbaramente pa spot y orario pa promocion politico na radio, corant y television. E comercialisacion di eleccion y politica aki tin como consecuencia cu ta exclui organisacionnan di menos recurso y esunnan cu ta suak na capital pa por comunica cu pueblo. Esaki ta ilustra y fortifica e echo cu eleccion y gobernacion ta un exclusividad di gran capital. Cu e consecuencia cu despues di eleccion ta”wie betaalt bepaalt” ta conta. Subimento di tarifa di radio, television y corant den temporada di eleccion pa dunamento di informacion politico ta un atentado serio contra democracia, libertad di expresion i e derecho fundamental di pueblo pa ricibi informacion politico pa e por vota consciente. Gobernacion na Corsou nunca a sali na defensa di democracia y libertad di expresion. Nunca niun gobierno a condena e libertinahe y abuso di prijs den temporada di eleccion. Esaki ta prueba di violacion di e principio di bon gobernacion.