Saburia berdadero, integridad, honestidad, respet y moralidad ta bini for di nos Tata cu ta den cielo.
E asunto no ta bay pa partido politico, ni tampoco pa e gobernante su estudio of titulo cu e por tin.
Pasobra Dios por cohe un hende bobo hacie sabi, y por pone uno sabi cu no respeta Dios actua manera hende bobo.
Tur hende mester sa cu despues di Dios, e diabel kier hunga sabi tur caminda y su trikinan ta di enganjo y semper e ta busca e lider of gobernante , pasobra asina e por enganja henter un pais..
Ta para scirbi: Pesey prome cu tur cos ,mi ta exhorta pa suplica,oracion, peticion y gradicimento wordo haci pa tur hende,pa reinan , y pa tur esnan cu ta den autoridad, pa nos hiba un bida trankil y keto den santidad y dignidad.( 1 Timoteo 2:1-4).
Sin ayudo di Dios, ningun gobernante of lider no por goberna, esaki a keda proba hopi biaha, pero te ainda hende no kier compronde cu Dios tambe mester tin su lugar den gobierno.
Cuanto lider of gobernante mundialmente no a bin cu ley cu a pone e pueblo trompica y cay den pica, of trose palabra di Dios, djis pa nan mantene amistad cu mundo.( Santiago 4:7).
Ta para scirbi: Laga tur hende,somete nan mes na e autoridadnan cu ta goberna. Pasobra no tin autoridad cu no ta di Dios, y esnan cu ta existi ta Dios a establece nan.( Romanonan 13:1).
Manera riunan di awa, asina curason di rey ta den man di Senjor, E ta bire pa unda cu E kier.(Proverbionan 21:1).
Den tur gobernacion y liderazgo Dios mester wordo respeta y poni na prome lugar, Pasobra ta para scirbi:
Pasobra pa medio di dj’E tur cos a wordo crea, tanto den e shelo como riba tera, visibel y invisibel,sea trononan of dominionan of gobernantenan of outoridadnan, tur cos a wordo crea pa medio di dj’E y p’E. ( Colosensenan 1 :16-17).
Awor pakico hende ta yama Senjor, y no ta haci locual Senjor ta bisa. Pasobra ta e hacido di e palabra di Senjor ,ta haci e boluntad di Senjor.
Ora un pais ta rebelde, e tin hopi gobernante, ma un hende cu comprendemento y conosemento ta mantene orden.( Proverbionan 28:2).
Hopi hende ta lubida cu den e pas di Dios, nos lo tin pas.Pasobra pega na Senjor nos por tur cos , lew for di Senjor,nos no por nada.
Esun cu ta kere den e Yiu tin bida eterno, ma esun cu no obedece e Yiu lo no mira bida, ma e furia di Dios lo keda riba dje.( Juan 3:36).
E mundo ta birando tur dia mas malo. Mas inmoralidad, mas perversidad y enganjo, pasobra scuridad kier domina mundo.
E pueblo mester pone su parti y haci oracion pa su gobernante nan, pasobra ta para scirbi:
Nos lucha no ta contra carni ,y sanger, sino contra gobernantenan, contra e podernan,contra e forsanan mundial di e scuridad aki, contra e forsanan spiritual di maldad den lugarnan celestial.( Efesios 6:12).
Awor nos por compronde dicon gobernantenan ta confronta asina tanto problema pa goberna y con nan mes ta contra otro, pasobra e enemigo ta gusta division, y no lubida su plan den Juan 10:10.
Si Mi pueblo cu a wordo yama na Mi nomber, humiya nan mes, y haci oracion,y busca Mi cara, y bira for di nan mal caminda,e ora ey lo Mi tende for di shelo, y lo Mi sana nan tera. ( 2 Cronicanan 7:14).