Minister Geoffrey Wever a reuni cu director di Centraal Bureau voor de Statistiek (CBS) sr. Marlon Faarup y director di Departamento di Finansa sr. Derrick Werleman pa por establece loke pa Aruba lo bai conta como e sector colectivo (“collectieve sector”).
Pa varios tempo CBS Aruba hunto cu CBS Hulanda ta trahando riba e constelacion di e sector colectivo loke mester wordo establece entre Hulanda y Aruba como parti di e ley di supervision financiero (LAFT). E LAFT ta prescribi cu Aruba mester tin un surplus di 1% di e sector colectivo. Minister Wever, hunto cu CBS y Departamento di Finanza a reuni riba e conseho cu CBS Aruba a prepara.
“Mi ta sumamente contento cu e trabou importante aki a keda cla y ta gradici Sr. Marlon Faarup, CBS Aruba y CBS Hulanda pa a finalisa e trabou importante aki. Tur dia Aruba ta pone pasonan concreto pa mehora su maneho financiero y ta hopi departamento y empleadonan publico ta responsabel pa e logronan aki”, segun Minister Geoffrey Wever.
E sector colectivo ta consisti di e total di institutonan gubernamental (incluyendo companianan cu un tarea gubernamental) cu banda di ehecuta nan deber publico y nan rol den regulacion economico, ta produci principalmente servicionan (of productonan) no-comercial pa uzo individual of colectivo y ta redistribui entradanan y bienes. Pa yega na esaki ta tene cuenta cu diferente factornan cu riba plataforma internacional ta wordo desaroya, pa cual motibo CBS tin su rol den esaki.