Laso entre Aruba y Riohacha a resalta
Diasabra 19 di april, den cuadro di Stichting Rancho su di 15 aniversario a organisa un simposio
na Universidad di Aruba, titula “Heritage, History and Healing Aruba’s Future” cu ta pone
enfasis riba e resiliencia y determinacion di e pueblo Arubano pa enfrenta reto y lucha pa un
futuro comun pa tur hende.
Prome Minister, mr. Mike Eman tabatin e honor pa habri e simposio cu un discurso inspirador,
na cual a subraya cu prosperidad real por solamente logra ora tur hende ta gosa di esaki. Aki
Prome Minister a referi na e pasado rico di Oranjestad y particularmente e bario historico di
Rancho, unda cu e piscadornan balente a forma e fundeshi di e comunidad Arubano.
Como referencia Prome Minister Mike Eman conta e historia impresionante di Boei Orman, un
piscado legendario di Rancho, cu despues di a perde riba lama grandi a logra yega bek na tera
danki na su determinacion y instinto di sobrevivencia, acompaña pa un fuerte sentido di
responsabilidad pa su famia y comunidad.
Durante su discurso, a reflexiona riba e maneranan cu nos pueblo chikito a nace for di e
circunstancianan duro y con e espirito di e piscadonan di Rancho, den tempo di necesidad
tabata ta e pilar riba cual e comunidad tabata depende. E determinacion pa subi lama bruto y
trece alimentacion pa henter comunidad ta un simbolo fuerte cu por logra ora pueblo ta traha
hunto pa un meta comun.
“Hustamente na e momento cu Aruba tabata bringa pa tin su propio waf, pa haya tur locual e
piscadornan tabatin mester, nos a bin realisa riba e isla chikito aki yama Aruba, cu nos tabatin
hopi limitacion den e derecho di autodeterminacion y pa maneha nos propio pais, y for di e
suelonan di Rancho, a nace e sentimento y deseo pa Aruba un dia por goberna su mes mas
ampliamente”, Prome Minister a expresa. E sentimento pa goberna nos mes, pa haya un waf,
pa trece sostenibilidad y dignidad, a nace literalmente for di suelonan di Rancho.
Durante e simposio, a pone enfasis riba e profundidad di nos relacion historico-cultural cu e
regionnan di e costa di Venezuela y Colombia, Guajira y Riohacha, cu un laso di pasado
comparti, pueblo indigena y intercambio cultural cu a duna forma na nos identidad nacional.
Na fin di su discurso, un ceremonia di sorpresa a tuma luga den cual sra. María Isabel Cavarcas
Aguilar, directora ehecutivo di “Fundacion Compartimos La Felicidad” y “Inspirarte”, a honra
Prome Minister Eman cu un sombre tradicional di Riohacha. Clifford Rosa, lider di Stichting
Rancho, y su ekipo tambe a ricibi e reconocementonan formal for e autoridadnan relevante di
Riohacha pa nan trabou continuo pa conserva y honra e herencia di nos pueblo.
