Dos siman pasa secretario di estado Zsolt Szabo tabata na Aruba y tabata hopi cla y raspa cu e ponencia cu e gobierno tabata desea pa transforma cierto parti di debe den inversion, ta algo imposibel den wowo di e Hulandes nan. Segun secretario di estado Zsolt Szabo Hulanda por haci esacki pero riba su propio forsa. Sinembargo lamentablemente no por a tuma nota cu prome Minister Mike Eman ta transparente cu comunidad di Aruba y a bisa cu e no a haya oportunidad pa combersa cu ne, pero den parlamento secretario di estado Zsolt Szabo tabata hopi cla cu tur e fraccionnan den parlamento. Pa e motibo aki mes parlamento di Aruba a tuma e decision pa pidi un reunion den e caso aki pero lamentablemente te awe e reunion publico no a wordo yama.
Lider di fraccion di PPA ta indica cu no a logra pa haci e reunion den parlamento door di e iresponsabilidad di gobierno , pero tampoco no a logra e frente nacional pa hunto como Aruba atende cu e situacion aki cu Hulanda unda cu ta mustra Hulanda cu Aruba ta uni manera cu a wordo haci den añanan 40-50 -70-80 na momento cu Aruba tabata bringa pa su status aparte.
Sinembargo awe por mira e consecuencia di cobardia di parti di esunnan cu ta den gobierno cu ta un matrimonio di AVP y FUTURO cu yen di condicion sin confiansa den otro. Nos tur ta na altura na Aruba cu algun luna pasa e dos lidernan cu ta forma parti di gobierno awe ta contra otro pa loke ta trata e pensamento di Rijkswet y e posicion cu mester tin pa Hulanda, pero e realidad ta awe cu nos por scucha Hulanda ta bisa cu pa motibo cu no a cumpli unda cu Parlamento tin mas di 60 dia ta pidi pa e reunion aki y no a haya e reunion aki.
Lider di fraccion di PPA Otmar Oduber ta indica cu a adverti y a bisa cu ningun formacion di gobierno no por cambia acuerdonan cu Aruba tin y cu nan sa cu e discusionnan aki ta andando mas cu 11 aña caba desde cu partido AVP ta den gobierno y cu CAFT a bin na vigor e tempo ey cu ya caba tabata discuti e puntonan aki di Rijkswet.
Awe por mira riba e mal pensamento politico ta mira e consecuencia di cu e baca ta hoga unda cu e pueblo di Aruba ta haye ta bay paga miyones adicional. Pa fin di e luna aki e interes ta bay bek na e 6.9% cu Hulanda a bisa cu lo pone esaki si no yega na un acuerdo , pero tur esaki ta pasa pa capricho y inmadurez politico un biaha mas pa esunnan cu ta sinta den gobierno , esta esunnan cu tabatey y esunnan cu t’ey na e momentonan aki ainda nan no kier duna cara na parlamento di Aruba.
Lamentablemente den un forma intrasparente presidente di Parlamento nobo Marlon Sneek no a yama e reunion como un reunion publico pa e topico aki, pero awo ta gobierno mediante di minister di finansas kier bin duna informacion riba Rijkswet dia 29 di April.
E reunion importante aki pa Pais Aruba ta wordo yama y lamentablemente e no ta wordo yama como un reunion publico pa pueblo haya sa kico ta pasando y kico ta e decisionnan di e gobierno di AVP-FUTURO , dus e decisionnan riba Rijkswet no ta bay ta transparente pa pueblo sa kico ta e posicion di cada fraccion den parlamento.
Fraccion di PPA ta lamenta tur e weg
anan cu ta wordo haci rond di Rijkswet unda cu ta keda rek e cakiña aki y na final di dia ta e pueblo di Aruba ta bay sufri di dje.